Şöbə müdirini maşınla vurub öldürənə 3 il iş verildi

Bakı Ağır Cinayətlər Məhkəməsində piyadanı vurub öldürərək hadisə yerindən qaçmaqda təqsirləndirilən 16 yaşlı Qurbanəli Qurbanova hökm oxunub.

"Qafqazinfo"nun verdiyi xəbərə görə,məhkəmənin hökmü ilə Q.Qurbanov 3 il müddətinə azadlıqdan məhrum edilib.

Hadisə 2018-ci il dekabrın 21-də saat 19 radələrində Xətai rayonu Nobel prospektində baş verib. Yolu keçən Bakı şəhər sakini, 1981-ci il təvəllüdlü Ləman Süleymanlı naməlum avtomobillə vurulub və orada ölüb. Sürücü isə hadisə yerindən qaçıb.

Hadisənin “Nissan” markalı avtomobillə törədilməsi, sürücüsünün isə Bakı şəhər sakini 16 yaşlı və sürücülük vəsiqəsi olmayan Q.Qurbanov olması müəyyən edilib və o saxlanılıb.

Ləman Süleymanlı "AzərTürkBank"ın mühasibi, şöbə müdiri vəzifəsində işləyib. 

Ləmanın atası Rafiq Süleymanlı əməkdar müəllimdir. Heydər Əliyev adına Liseydə çalışan R.Süleymanlı Xətai rayon Təhşil şöbəsinin müdir müavini olub. Dövlət İmtahan Mərkəzinin keçirdiyi qəbul imtahanları zamanı sualların tərtibatında yaxından iştirak edib və qurumun eksperti olub. Filologiya üzrə fəlsəfə doktorudur.

Anası Pəri Süleymanlı isə "Evrika Liseyi”nin direktor müavinidir. Buna qədər isə Heydər Əliyev adına Liseydə direktor müavini olub. Fizika-riyaziyyat elmləri üzrə fəlsəfə doktorudur.