Avar icması İlham Əliyevə müraciət etdi: “İşğalçılara qarşı döyüşmək üçün əmrinizi gözləyirik” - Foto

Ermənistanın Azərbaycana qarşı təcavüzkar siyasəti, yeni ərazilərin işğal edilməsinə cəhd göstərilməsi, Tovuz rayonunun yaşayış məntəqlərinin bombalanması ölkəmizdə döyüş əhval-ruhiyyəsini artırıb. Son bir neçə gün ərzində minlərlə şəxs könüllü olaraq Azərbaycan ordusunun sıralarına qatılmaq və işğalçılara qarşı döyüşlərdə iştirak emək üçün müvafiq qurumlara müraciətlər ünvanlayırlar.

Ali Baş Komandanın çağırışına səs verənlər sırasında müxtəlif yaş kateqoriyasının nümayəndələri kimi, müxtəlif xalqların təmsilçiləri də çoxluq təşkil edirlər.

Reyting.az xəbər verir ki, Azərbaycan Respublikasının Prezidenti, Ali Baş Komandan cənab İlham Əliyevə növbəti belə bir müraciəti Avar icması adından Azərbaycan-Avar İctimai Birliyi İdarə Heyətinin sədri Məhəmməd Nooyev edib.

Həmin müraciəti təqdim edirik:

“Möhtərəm cənab Prezident, Ali Baş Komandan!

İşğalçı Ermənistan Respublikası və onun cinayətkar rəhbərliyi Azərbaycan Respublikasına qarşı təcavüzkar siyasətini son günlər daha da genişləndirməyə və digər əraziləri işğal etməyə çalışır. Dağlıq Qarabağı və ətraf rayonları işğalda saxlamaqları azmış kimi hələ işğal bölgəsindən xeyli uzaq məsafədə yerləşən Tovuz rayonu ərazisinə də hücuma cəhd edir və Azərbaycanın dinc əhalisinə qarşı hərbi cinayətlər törədir, kəndləri artilleriya atəşinə məruz qoyur. Bütün dünya koronavirus adlı qlobal pandemiya ilə mübarizə aparmaqdaykən Ermənistan fürsətdən istifadə edib Azərbaycanın yeni ərazilərini işğal etmək istəyir. Lakin bu dəfə unudur ki, onun qarşısında duran 1990-cı illərin əvvəllərindəki nizamsız ordu deyil, özünün sabit və güclü imkanları, bölgəmizin ən güclü ordusu ilə seçilən Azərbaycandır. Elə bu üstünlüyümüz də bizə imkan verdi ki, düşməni nəinki geri oturdaq, üstəlik onun hərbi texnika və canlı qüvvəsini də məhv edək. Belə bir zamanda Ermənistanın bu təcavüzü Azərbaycan xalqını haqlı olaraq ayağa qalxmağa, Ali Baş Komandanın ətrafında daha sıx birləşməyə sövq etdi. Yüz minlərlə Azərbaycan gənci ordumuza könüllü qatılmaq, işğalçı Ermənistana öz yerini göstərmək üçün Ali Baş Komandan olaraq Sizə üz tutdu. Siz də hər zamankı əminliklə bəyan etdiniz ki, Azərbaycan ordusu indiki durumda əlavə səfərbərliyə ehtiyac duymur. Lakin belə bir iradə nümayişi, əlbəttə, hamımızın ürəyincə oldu.

Möhtərəm cənab Ali Baş Komandan,

Səfərbərlik üçün ayağa qalxmış yüz minlərlə Azərbaycan gəncinin arasında bizim icmamızın da çoxsaylı nümayəndələri var. Onlar da hər bir azərbaycanlı kimi ümumi Vətənimiz olan Azərbaycan naminə düşmən qarşısına çıxmaq, torpaqlarımızın azadlığı uğrunda döyüşməyə, hətta canlarını fəda etmək üçün Sizin əmrinizi gözləyirlər. Biz vahid Azərbaycan xalqının tərkib hissəsi olaraq ölkəmizin bir qarış torpağının belə Ermənistanın işğalı altında qalmasına dözmək fikrində deyilik. Ona görə də Sizə torpaqlarımızın işğaldan azad edilməsi yolunda apardığınız işdə yenidən tam dəstəyimizi ifadə edir, əmrinizə hazır olduğumuzu bildiririk. Tək bir çağırışınız yetər ki, bütün azərbaycanlılar kimi biz avarlar da silaha sarılıb işğalçı Ermənistana qarşı canımız və qanımızla savaşaq!

Qarabağ savaşında bu vaxtadək çox sayda avar gənclərimiz iştirak edib, onlardan bəziləri şəhid olub. Avar şəhidlər də daxil olmaqla bütün Azərbaycan şəhidlərinin qisasını almaq üçün qüdrətli ordumuzun tərkibində düşmən qarşısına çıxmağa hər an hazırıq.



Avar icması adından,

Məhəmməd Nooyev, Azərbaycan-Avar İctimai Birliyi İdarə Heyətinin sədri”.