General-mayor Şəkinski vəfat etdi

Daxili İşlər Nazirliyinin Nəqliyyatda Baş Polis İdarəsinin rəisi, polis general-mayoru Emin Şəkinski vəfat edib.

“BakuPost”un   məlumatına görə, 59 yaşlı generalın səhhətində müəyyən problemlər var imiş.

Şəkinski Emin Əkrəm oğlu 1985-ci ildən daxili işlər orqanlarında xidməti fəaliyyətə başlayıb. O, Bakı şəhəri Baş Polis İdarəsinin Cinayət Axtarış İdarəsində şöbə rəisi, Yasamal RPİ-nin 26-cı polis bölməsinin rəisi, Xətai RPİ-nin rəis müavini vəzifələrində işləyib, 2004-cü ilin avqust ayında isə DİN-in Daxili Təhlükəsizlik İdarəsinin rəisi vəzifəsinə irəli çəkilib.

2005-ci ilin aprel ayından DİN-in Baş Cinayət Axtarış İdarəsinin rəisi vəzifəsinə təyin edilib.

Emin Şəkinski 2015-ci ildə həyat yoldaşı Gülnarə Şəkinskayanın evdən 60 min manat oğurlayaraq övladları - Həmidə, Məryəm, Nadiya və Cəvahiri saxta sənədlərlə ölkədən çıxararaq qaçmasına görə aparılan cinayət işi ilə gündəmə gəlmişdi. E.Şəkinski bu hadisədən hüquq-mühafizə orqanlarına şikayət etmişdi. G.Şəkinskayaya kömək edən bir neçə vətəndaş və Azərbaycan Miqrasiya Mərkəzinin rəhbəri Əlövsət Əliyev cinayət işi üzrə təqsirləndirilmişdi. Əlövsət Əliyev o zaman beynəlxalq axtarışa verilmişdi.