Generalların doğulduğu yerlər də işğaldan azad edildi

Azərbaycan Ordusu işğal altında olan torpaqları, rayonları azad etmək üçün hərbi əməliyyatları davam etdirir. Ordu birliklərinə rəhbərlik edən iki general isə 27 il idi ki, məcburi köçkün idilər. Artıq onlar doğulduqları yerləri düşmən tapdağından azad ediblər.

“Qafqazinfo”nun verdiyi xəbərə görə, birlik komandiri, general-mayor Mayis Bərxudarov 20 aprel 1976-cı ildə Qubadlı şəhərində doğulub. Mayis Bərxudarov uşaq vaxtlarında güləşlə məşğul olub. Azərbaycanın Milli Qəhrəmanı, güləşçi Əliyar Əliyevin tələbəsi olub. 90-cı illərdə Qarabağ müharibəsində şəhid olan müəllimi Əliyar Əliyevə söz verib ki, Azərbaycan bayrağını Ə.Əliyevin şəhid olduğu "Laçın dəhlizi"ndə sancacaq. Prezident İlham Əliyev Cəbrayıl şəhərinin və rayonunun 9 kəndinin işğaldan azad olunması münasibətilə Mayis Bərxudarovu təbrik etmişdi. Dünən isə general-mayor Mayis Bərxudarovun doğulduğu Qubadlı şəhəri işğaldan azad edilib. Generalın doğma şəhəri geri qaytarıldı, indi isə növbə şəhid olan müəlliminə verdiyi sözdədir. 27 il kəndi işğal altında olan daha bir generalımız isə Hikmət Həsənovdur. 1-ci Ordu korpusunun komandiri H.Həsənov Suqovuşanı işğaldan azad etdiyi üçün Ali Baş Komandan tərəfindən təbrik alıb. General-mayor Hikmət Həsənov 1975-ci il oktyabrın 9-da Füzuli rayonunun Pirəhmədli kəndində anadan olub. Orta məktəbdə oxuduğu vaxt Ermənistan Füzuli rayonunu və generalın doğulduğu kəndi işğal edib. Bu hadisədən sonra Hikmət Həsənov hərbçi olmaq fikrini qətiləşdirib. 1992-ci ildə Bakı Ali Ümumqoşun Komandirləri Məktəbinə daxil olub. Elə həmin ildə cəbhədə vəziyyətin pis olduğunu görüb və ərizə yazaraq təhsilini yarımçıq qoyaraq doğma kəndi uğrunda döyüşlərə qatılıb. Prezident İlham Əliyev oktyabrın 17-də Füzuli şəhəri ilə birgə rayonun Pirəhmədli kəndinin da işğaldan azad edildiyini açıqlayıb. General-mayor Hikmət Həsənov da artıq məcburi köçkün deyil.