Rəşad İlyasov 3 ildən sonra efirə qayıtdı- EFİR QADAĞASI

Əməkdar artist Rəşad İlyasov üç illik fasilədən sonra yenidən aparıcı kimi efirə qayıdır.

“Qafqazinfo” xəbər verir ki, 2019-cu ildə AzTV və Mədəniyyət kanalından kənarlaşdırılan sənətçi ötən gündən tamaşaçı qarşısına çıxır. O, Mədəniyyət televiziyasında “Səhərçağı” proqramında aparıcılıq edir.

Xatırladaq ki, R. İlyasov üç il əvvəl Space TV-də yayımlanan “Hər səhər” verilişində həmkarı Rüfət Axundovla söyüşlü duet ifa etmişdi. Belə ki, R. Axundov fonoqram mahnı ifa edərkən səs rejissoru mikrofonları bağlamağı unutmuşdu. Rüfətlə birlikdə Rəşad İlyasov da mikrofonun bağlı olduğunu zənn edərək mahnının sözlərində qeyri-etik ifadələr işlətmişdi.

Milli Televiziya və Radio Şurasının (MTRŞ) açıqlamasına əsasən, 5 aprel 2019-cu il tarixdə kanalın İnzibati Xətalar Məcəlləsinə uyğun olaraq 5-8 min AZN cərimə olunması ilə bağlı kanal rəhbərliyinin iştirakı ilə protokol tərtib edilmiş, qəbul olunmuş, iş məhkəməyə göndərilmişdir.

AzTV sənətçinin “Yaradanlar və yaşadanlar” adlı verilişini bağlamış, ona 6 ay müddətinə efir qadağası qoymuşdu.