Vilayət Quliyev Bakıdakı kafe qiymətlərindən şikayətləndi

Azərbaycanın Bosniya və Herseqovinadakı fövqəladə və səlahiyyətli səfiri Vilayət Quliyev Bakı və Polşanın paytaxtı Varşavada səhər yeməklərinin qiymətini müqayisə edib.

“Qafqazinfo” xəbər verir ki, səfir öz feysbuk hesabında ölkəmizdə qiymətlərin baha olduğunu və buna görə də turistlərin az gəldiyini qeyd edib.

“Yüksək materiyanı bir tərəfə qoyaq. Həm də Marks deyirdi ki, insanlar yüksək materiya ilə məşğul olmazdan əvvəl yeməli, içməli və geyinməlidirlər.

Varşavanın mərkəzində beş seçimdən birini edib 10 manata (25 zlotı, yaxud 6 dollar) belə müxtəlif çeşidli səhər yeməyi sifariş vermək mümkündür. Üstəlik kofe, yaxud çay da bu hesaba daxildir”, - deyə səfir qeyd edib.

Vilayət Quliyev bildirib ki, Bakının mərkəzində isə 10 manata yalnız iki fincan çay içmək olar: “Düzdür, yanında bir mikroskopik ölçülü qurabiyə də verirlər. Sonra da şikayətlənirik ki, ölkəmizə turistlər az gəlir…”