Mənsimovdan İlham Əliyevə 11 Aprel dəstəyi
Aprelin 11-də prezident seçkisinin keçirilməsi çox düzgün seçimdir.
NUH.az xəbər verir ki, bu fikirləri Türkiyənin nüfuzlu “Habertürk” nəşrinə “Palmali” şirkətlər qrupunun sahibi Mübariz Mənsimov deyib.
Azərbaycan üçün önəmli olan Rusiyada da oxşar bir seçkinin olacağını, Türkiyədə də gələn il seçkilərin keçiriləcəyini xatırladan iş adamı Mənsimov ölkəmizdəki seçkilərin aprelin 11-də keçirilməsi qərarının bölgədəki siyasi proseslərlə uyğun olduğunu bildirib.
Ölkə başçısı İlham Əliyevin hakimiyyətə gəldiyi gündən Azərbaycanı yeritdiyi uğurlu daxili, xarici, həm də iqtisadi siyasətlə inkişafa apardığını vurğulayan Mənsimov bildirib:
“Hazırda dünyada baş verən iqtisadi problemlərə baxmayaraq, Azərbaycanda valyuta etiyyatları sabit şəkildə artır. Bu çox vacib məsələdir. Mən öncə də demişdim, əslində, bir iş adamının siyasət barədə fikir yürütməsi uyğun deyil. Ancaq mənim bir səsim var. Hər zaman olduğu kimi, hər bir Azərbaycan vətəndaşı kimi seçkilərdə iştirak edib səsimi İlham Əliyevə verəcəyəm. Türkiyə ilə Azərbaycan arasında olan qardaşlıq münasibətlərinin də bu seçkilərdən daha da güclənərək çıxacağı fikrindəyəm”.