Zakir Fərəcov Qubadakı şəlaləni villasına köçürüb
Məmurların meşəni, dəniz sahilini hasarlaması, çayları, gölləri özəlləşdirməsi, dağları dağıdıb daş karxanası etməsi Azərbaycanda adi hala çevrilib. Düzdür prezident İlham Əliyev hərdən belə məmurlara təpinir. Amma nə faydası...Məmurlar istədiyini edir.
NUH.az-a daxil olan məlumata görə, Quba-Xınalıq yolunun Qırız-Dəhnə ərazisində, daha dəqiq desək, məşhur “Nazlı bulaq”a çatmamış gözəl bir şəlalə var imiş.
Yoldan keçənlər bu gözəl mənzərənin önündə dayanıb şəkil çəkdirər və sərinləyərdilər. Bir gün ərazinin sakinləri səhər yuxudan ayılanda görüblər ki, şəlalə yerli-dibli yoxa çıxıb.
Qədim zamanlarda əjdaha qardaş suyun başını kəsdirib camaatı suya həsrət qoyarmış.
İndi əjdaha qardaşı məmurlar əvəz edir.
Əlqərəz, Quba camaatı xeyli axtarışdan sonra məşhur şəlalənin yerini tapa bilib. Sən demə, Sumqayıtın icra başçısı Zakir Fərəcovun şəlaləyə mehri qonubmuş. Və gecə ilə şəlaləni 10 km uzunluğunda 300 mm-lik boru ilə ərazidəki möhtəşəm villasına aparıb.
Yaxın günlərdə məşhur şəlalə ilə bağlı çəkilişi təqdim edəcəyik.
Qarşı tərəfin mövqeyini dərc etməyə hazırıq.