Almaniya Buhenvald konslagerinin gizli tunellərində nasistlərin gizlədiyi ağlasığmaz dərəcədə zəngin xəzinələrin axtarışına başlayıb.

Qaynarinfo KP-ru-ya istinadən xəbər verir ki, bəzi versiyalara görə, dünyanın 8-ci möcüzəsi adlanan Kəhrəba otaq məhz burada gizlədilib. Keçmiş faşist konsentrasiya düşərgəsi Buhenvald ərazisində axtarışlara rəsmi olaraq oktyabrdan start verilib. Hazırda Üçüncü Reyxin xəzinələrinin gizlədildiyi düşünülən gizli tunel və şaxtalarda qazıntı işləri gedir. 1941-ci ildə vehrmaxt tərəfindən Rusiya imperatorlarının Çarskoye Selo bölgəsindəki yay iqamətgahından çıxarılan məşhur Kəhrəba otağın da burada gizlədildiyi güman edilir. Məlumata görə, Berlindən Buhenvalda köçən SS Baş Əməliyyat İdarəsinin bütün məxfi sənədləri də burada "dəfn edilib”. "Bəs Almaniya hökumətinin qazıntılara məhz oktyabrda başlamasının səbəbi nədir” – sualına cavab verən Üçüncü Reyx üzrə mütəxəssis, tarixçi Konstantin Zalesski deyib ki, səbəb çox güman, faşistlərin işğal etdikləri ərazilərdən gətirdiyi xəzinələrlə ağzınacan dolu gizli tunellər haqda yayılan çoxsaylı məqalə və şayiələrə birdəfəlik son qoymaqdır – varmı, yoxmu: "Bu şayiələr 90-cı illərdən bəri yayılmağa başlayıb. Buhenvaldda bir şey tapılıb-tapılmayacağından asılı olmayaraq, hər halda bir nəticə olacaq. Əsas olan odur ki, əməliyyat rəsmi olaraq elan edilib. Xatirə abidəsinin yerləşdiyi ərazi ciddi qorunur. Burada kimsə özbaşına axtarış apara bilməz. Artıq qazıntılara rəsmən icazə verilib. Xüsusi vurğulamaq istəyirəm ki, dövlət səviyyəsində spekulyasiyaların şişirdildiyi qonşu Polşadan fərqli olaraq, Almaniyada Üçüncü Reyxin bu gizli xəzinələri söhbətinə çox ciddi yanaşır, bu barədə ucuz fərziyyələri sevmirlər”. Qeyd edək ki, faşistlər işğal etdikləri ölkələrin bütün xəzinə və banklarında saxlanılan qızıl ehtiyatlarını qarət edərək Almaniyaya gətiriblər. Bəşər tarixindəki ən böyük qızıl soyğunçuluğuna 1938-ci ilin mart ayında başlanılıb. Avstriyanı ilhaq etdikdən sonra nasistlər bu ölkənin Milli Bankından 91,147 kq qızıl götürüb. Çexoslovakiya, Dansiq, Hollandiya, Lüksemburq, eləcə də Belçika kimi azad şəhərin bütün qızıl ehtiyatı qarət edilib. İstifadəyə götürülmüş yunan qızılının miqdarı isə məlum deyil. Danimarka, Norveç, Fransa vaxtında duyuq düşərək öz qızıl ehtiyatlarının böyük hissəsini İngiltərə və ABŞ-a nəql edə bilib. Polşa isə qızıl ehtiyatının 65 tonunu dolayı və sərgüzəştli yollarla Afrikaya, oradan da ABŞ-a göndərməyə nail olub. Belçika da bənzər hiylə işlətməyə çalışsa da, nasistlər Belçikanın Afrikadakı 270 ton qızılını ələ keçirərək Berlinə aparıblar. Nasist xəzinəsi işğal edilmiş ölkələrin vətəndaşlarının şəxsi əmlakları ilə də doldurulub. İkinci Dünya Müharibəsi başlamazdan əvvəl bu qarətin əsası qoyulub - 1 yanvar 1939-cu ildə Hermann Göring Üçüncü Reyxdən köçən yəhudilərin bütün əmlaklarının dövlətin lehinə müsadirə ediləcəyi ilə bağlı bir qərar hazırlayıb. Qərara görə, "Mülklərindəki qızıldan, platindən, gümüşdən, habelə qiymətli daşlardan və incilərdən olan hər hansı əşyalar" təhvil verilməli idi. Yarandığı vaxtdan etibarən konsentrasiya düşərgələri, krematoriyalar, qaz kameralarında öldürülənlərin qızıl dişlərini çıxarmağa başlayıblar. Təkcə Osvensim ölüm düşərgəsində Degussa (qızıl və gümüşün çeşidlənməsi üzrə Alman müəssisəsi) gündəlik 11 kq-a qədər qızıl diş tacı, zərgərlik və s. məmulatı ölüm düşərgəsindən Reyxsbanka göndərirdi. Bu kabus müharibənin sonuna qədər davam etmişdi. 1943-cü ildə Fürerin sağ əli, hiyləgər Martin Bormann müharibənin itirildiyini başa düşərək, Almaniyadan qızıl, qiymətli daşlar və digər qiymətli əşyaları çıxarmaq üçün gizli "Qartal uçuşu" əməliyyatını planlaşdıraraq həyata keçirdi. Əvvəlcə xəzinələr gizli olaraq təyyarələrə, gəmilərə, sualtı qayıqlara yüklənərək nasist koloniyalarının mövcud olduğu Cənubi Amerikaya göndərildi. Təkcə Bormanın öz qızılı ondakı qiymətlərlə 1.12 milyard dollar məbləğindəydi. İndi əlbəttə dəyəri dəfələrlə artıb. Bundan başqa isə platin, qiymətli daşlar, sikkələr, rəsmlər, səhmlər, istiqrazlar... Xəzinələrin bir hissəsi Avropada gizlədilib. Üçüncü Reyxin ərazisində isə əsasən duz, kömür və digər mədənlərdə yalnız Bormanın nəzarəti altında olan 134 (!) gizli xəzinə olub. 19 mart 1945-ci il tarixli xüsusi "Neronun Fərmanı"na əsasən, müttəfiqlərin əlinə keçməsin deyə xəzinələrin çoxuna partlayıcı maddələr quraşdırılıb. Hitlerin kolleksiyasında olan ən bahalı rəsmlər Avstriyanın Altaussee şəhərinin yaxınlığındakı mədənlərdə gizlədilib. Bu xəzinələrin yanında isə 500 kiloqramlıq avia-bomba yerləşdirilib... Avropadakı dünya sənət əsərlərinin gizlədildiyi əsas nasist anbarlarından biri Füssen şəhəri yaxınlığındakı Bavariya Alplarındakı Neusşvanstein qalası olub. SS-çilər qalanı müharibənin sonunda partlatmağı planlaşdırsalar da, müttəfiqlər bu qorxunc planı poza bilib. Bundan sonra düz altı həftə talan edilmiş şah əsərlərin buradan daşınmasına sərf edilib. Lakin nasistlər Reyxsbank qızıl ehtiyatının bir hissəsini aprelin sonunda qaladan çıxarıb apara biliblər. Üstəlik naməlum istiqamətə! İndi sözügedən xəzinələrin miqyasını təsəvvür etmək çətin deyil...