Dərc edilib: 26-04-2020

https://www.nuh.az/23968-.html

Əli Məsimli: "Uşaqpulu birdəfəlik həll olunmalıdır"

26.04.2020 08:36:19

LIVE
"Biz həmişə uşaqpulu məsələsinin birdəfəlik həllinin tərəfdarı olmuşuq".

Bunu Qaynarinfo-ya açıqlamasında Milli Məclisin deputatı Əli Məsimli deyib.  Onun sözlərinə görə, uşaqpulu bərpa edilsə, yardıma ehtiyacı olan insanların problemi həll olunmuş sayılar:

"Koronavirus pandemiyasının törətdiyi fəsadlar əhalinin aztəminatlı təbəqəsinin sosial müdafiəsinin gücləndirilməsi məsələsinin aktuallığını daha da artırıb. Belə bir şəraitdə hesab edirik ki, həm karantin rejiminin davam etdiyi hazırkı, həm də post-pandemiya dövründə bu yöndə getdikcə daha böyük aktuallıq kəsb edən məsələlər arasında uşaq hüquqlarının müdafiəsi məsələsi önə çıxarılmalıdır. Ölkənin sosial-iqtisadi inkişafı ilə əlaqədar olan sahələrin hər birinin inkişaf səviyyəsi birmənalı şəkildə ailələrə və bu ailələrdə böyüyən dövlətin ən böyük kapitalı olan uşaqlara, onların fiziki, əqli və mənəvi cəhətdən inkişafına birbaşa təsir göstərir. Bu mənada uşaq hüquqları ilə bağlı məsələlər, xüsusən də uşaqpulu məsələsi seçicilərimizlə keçirdiyimiz görüşlərimiz, həmçinin bizə daxil olan müraciətlər içərisində say baxımdan əhəmiyyətli yer tutur. Bu problemlərlə bağlı daim çalışırıq ki, həm qanunvericilik təşəbbüslərimzdə, həm komitə, həmdə ki, plenar iclaslarda bu məsələlərə toxunaq, onların həlli istiqamətində təkliflərimizi verək. Bu kontekstdə "uşaqpulu" məsələsi böyük aktuallıq kəsb edir. Ona görə də Milli Məclisin 24 aprel tarixli iclasında qaldırdığımız məsələlər arasında "uşaqpulu”nun bərpası məsələsi xüsusi yer tutdu. Çıxışımızda uşaqpulunun bərpasını təklif etməklə yanaşı həm də bildirdik ki, əgər biz uşaqpulunu bərpa edə bilsək, yardıma ehtiyacı olan insanların çoxunun problemini həll etmiş olarıq".

Əli Məsimli vurğulayıb ki, uşaqpulunun əleyhinə olanların bir qayda olaraq belə bir arqument söykənirlər: ""Onsuz da Azərbaycanda əhali kifayət qədər sürətlə artır. Ona görə də doğumu stimullaşdırmağa ehtiyac yoxdur”. Hesab edirik ki, bu düzgün mövqe deyil. Bizə sadəcə uşaq doğuşunun artımı yox, vətəninə layiqincə xidmət edə bilməsi üçün hər yeni doğulan uşağın sağlam, maddi cəhətdən ehtiyacsız, sıxıntısız, normal təhsil-tərbiyyəli böyüməsi lazımdır. Beynəlxalq praktikadan çıxış edərək demək olar ki, hazırda pandemiya ilə bağlı yaranmış sosial xarakterli problemlərinin xeyli hissəsini "uşaq pulu”nun bərpa edilməsi hesabına həll etmək olar. Bu həm də post-pandemiya dövrü üçün də işləyə bilən ən yaxşı mexanizm kimi özünü göstərə bilər. Ona görə də Azərbaycanda ötən ildən başlanan və 4,2 milyon əhalini əhatə edən sosial islahatların davamının çox önəmli və pik nöqtəsi kimi, optimal model əsasında aşağı gəlirli ailələr üçün "uşaq pulu” məsələsinin yaxın zamanlarda mərhələlərlə bərpasını zəruri hesab edirik". 

Əli Məsimli bildirib ki, uşaqpulu məsələsinin birdəfəlik həllinin tərəfdarı olub: "Çünki problemin birdfəlik həlli ən yaxşı variantdır. Amma hazırda pandemiyanın fəsadlarının və qeyri-müəyyənliklərinin təsiri ilə sosial xərclər sürətlə artır və bu ay, növbəti ay, ondan sonrakı aylarda nə qədər olacağı hələ bilinmir....Belə şərait uşaqpulu kimi kifayət qədər böyük maliyyə tutumlu məsələnin həllini mərhələli (məsələn, məktəbə qədərki yaş və sonrakı yaşlara bölməklə) etməyi və bir müddətdən sonra isə tamlaşdırmağı şərtləndirir. "Uşaq pulu” proqramı işə düşənə qədər isə bir sıra ailələrdə yaranmış hazırkı gərginlikləri azatmaqdan ötrü, həm beynəlxalq praktikada tətbiq olunan "uşaqların yeməyini təmin edək” üsulunun bizdə də tətbiqinə başlanılmasını, həm də hökumətin valideynləri işləməyən ailələrdəki uşaqlara müavinət verməsini zəruri hesab edirik".

  

NUH informasiya agentliyi səhifəsindən çap edilib