Xəbər verdiyimiz kimi, Rəşad Nəbi oğlu Nəbiyev Azərbaycan Respublikasının nəqliyyat, rabitə və yüksək texnologiyalar naziri təyin edilib. 

 

Xeberle.com xəbər verir ki, bununla bağlı Prezident İlham Əliyev sərəncam imzalayıb.

Rəşad Nəbi oğlu Nəbiyev bundan əvvəl "Azərkosmos” ASC-nin sədri vəzifəsində çalışıb. O, bundan əvvəl, 2004-2011-ci illərdə, Rabitə və İnformasiya Texnologiyaları Nazirliyinin Maliyyə, uçot və iqtisadi təhlil şöbəsinin müdiri vəzifəsində işləyib.

2002-2004-cü illərdə Azərbaycan Respublikası Mərkəzi Bankının Bazar əməliyyatları departamentində, 1997-2000-ci illərdə isə Azərbaycan Respublikası Prezidentinin İcra Aparatında İnformasiya resursları və texnologiyaları mərkəzində və Xarici əlaqələr şöbəsində çalışmışdır.

Qeyd edək ki, R.Nəbiyev 1994-2000-ci illərdə Azərbaycan Respublikası Prezidenti Yanında Dövlət İdarəçilik Akademiyasında təhsil alaraq Dövlət və bələdiyyə idarəetməsi ixtisası üzrə bakalavr və magistr dərəcəsi almış, 2000-2002-ci illərdə isə ABŞ-nın Şərqi Karolina Universitetində iqtisadiyyat üzrə magistr dərəcəsinə yiyələnib.

Daha sonra R.Nəbiyev təhsilini Harvard Universitetinin Kennedi İdarəçilik Məktəbində davam etdirərək 2006-cı ildə "Yüksək vəzifəli icraçı şəxslər üçün Dövlət maliyyə idarəetməsi proqramı”nı bitirib.

Saytımızın əldə etdiyi məlumata görə, R. Nəbiyev tanınmış ailənin nümayəndəsidir.

O, bir zamanlar Sumqayıt Şəhər Qaz İstismar İdarəsinin rəisi, daha sonralar Sumqayıt icra başçısının müavini işləmiş Nəbi Nəbiyevin oğludur. Eyni zamanda, R.Nəbiyev Sumqayıtın məşhur simalarından olan "Çörək Tofiq” kimi tanınan iş adamı Tofiq Hüseynovun kürəkənidir.