ATP Mətbuat Xidmətinin məlumatı

İclasda ATP sədri Teyyub Qənioğlu ölkəmizdə mövcud sosial-siyasi vəziyyət və partiya qarşısında duran vəzifələrə dair geniş çıxış etmişdir. 44 günlük Vətən Müharibəsində şanlı ordumuzun möhtəşəm qələbəsi nəticəsində Azərbaycanımızın beynəlxalq aləmdə tanınmış sədrhədlərimizin de -yure bərpa edildiyini qeyd edən T.Qənioğlu, təəssüflə vurğulamışdır ki, hələ də “sülhməramlıların” yerləşdiyi ərazilərimizdə süverenliyimizin de-fakto bərqərar olmasınna nail ola bilməmişik və bu xalqımız arasında müəyyən narazılığa səbəb olmaqdadır. Ancaq qəti əminik ki, bu müvəqqəti haldır və çox da uzaq olmayan zamanda bütün ərazilərimizdə süverenliyimizin tam bərqərar olmasına nail olacağıq! Əzəli və əbədi torpaqlarımızın yağı düşməndən azad edilməsində qəhrəman, qazi əsgər və zabitlərimizin, vətən uğrunda canından keçən şəhid əskər və zabitlərimizin (Allah onlara rəhmət eləsin!) əsas rol oynadığını qeyd edən T.Qənioğlu eyni zamanda qeyd etmişdir ki, bu möhtəşəm qələbənin əldə edilməsində Azərbaycan xalqının, mövqeyindən asılı olmayaraq bütün siyasi partiyaların yekdil mövqedən çıxış etməsi də əhəmiyyətli rol oynamışdır. Ancaq qarşıda görüləsi və ümummilli əhəmiyyət daşıyan çox iş var: istər iqtisadi, siyasi, istərsə də, sosial sahələrdə. Onların müvəffəqiyyətlə həll edilməsi üçün də, xalqımızın, mövqeyindən asılı olmayaraq bütün siyasi partiyaların yekdil mövqedən çıxış etməsinə nail olmaq lazımdır. Bunun üçün Təkamül Partiyası əlindən gələni etməyə hazırdır və edəcəkdir.

Ölkəmizdə mövcud sosial vəziyyətə toxunan T. Qənioğlu, benzinin, dizel yanacağının satış qiymətinin artırılması nəticəsində istehlak qiymətlərinin durmadan artmasının, ancaq süni qiymət artımının qarşısının alınması üçün heç bir tədbir görülməməsinin, bu azmış kimi, suyun və tullantı sularının qiymətinin 100,0% artırılmasının xalqın güzəranının pisləşməsinə səbəb olduğunu və bütün bunların cəmiyyətdə sosial gərginliyiyə səbəb olduğunu qeyd etmişdir. Belə vəziyyət minuimum əmək pensiyası, minimum əmək haqqı, əlilliyə görə cüzi məbləğdə müavinət alan, xüsusilə də, işsiz vətəndaşların güzəranına olduqca mənfi təsir etməkdədir. Təkamül Partiyası hesab edir ki, vəziyyətin getdikcə pisləşməməsi üçün əmək pensiyalarının, minimum əmək haqının məbləğinin, ilkin olaraq, ən azı 50,0% artırılması, az təminatlı ailələrə, şəhid ailələrinə, müharibədə müxtəlif dərəcəli bədən xəsarəti almış qazilərə verilən təqaüdlərin əhəmiyyətli dərəcədə artırılması və bu zaman himayəsində olan az yaşlı uşaqların sayının nəzərə alınması məqsədəuyğun olardı. Bu sahədə Əmək və Əhalinin Sosial Müdafiəsi Nazirliyinin fəaliyyətinin əsaslı şəkildə yaxşılaşdırılmasına ehtiyac verdır. Ancaq KİV-də yayılan məlumatlar göstərir ki, qeyd edilən sahələrdə, xüsusilə Vətən Müharibəsində əlil olmuş qazilərə münasibətdə, nazirliyin “fəaliyyəti” əks nəticələr doğurmaqdadır.

Son illər ölkəmizdə aparılan iqtisadi islahatlara toxunan T.Qənioğlu onları təqdir etdiyini, ancaq bu islahatların daha genişləndirilməsinin və dərinləşdirilməsinin vacibliyini diqqətə çatdırmışdır. Bu, azad edilmiş ərazilərimizin bərpasının tezləşdirilməsi üçün xüsusi əhəmiyyət kəsb edir. ATP hesab edir ki, indiki zamanda bank-maliyyə siztemində, sığorta bazarında əsaslı islahatlara , iri xarici bankların və sığorta şirkətlərinin ölkəmizə gəlməsi üçün müvafiq hüquqi bazaların təkmilləşdirlməsinə ciddi ehtiyac vardır.

Son illər ölkəmizdə aparılan kadr islahatlarına toxunan T.Qənioğlu bu istiqamətdə tədbirlərin daha sürətlə həyata keçirilməsinin vacib olduğunu diqqətə çatdırmışdır. KİV-də yayılan məlumatlar göstərir ki, bəzi “köhnə” kadrların gənclərlə əvəz edilməsi və onların “fəaliyyəti” heç də həmişə uğurla nəticələnməmişdir. Ona görə də, yeni kadrlar irəli çəkilərkən onların hansı “mühitdə yetişdiyi“ nəzərə alınmalı, bu sahədə himayədarlığa son qoyulmalıdır.

Siyasi sahədə aparılan islahatlara toxunarkən Prezident İlham Əliyevin təşəbbüsü ilə son illər iqtidar-müxalifət münasibətlərinin sivil mübarizə müstəvisinə keçdiyini, siyasi dialoqon genişləndiyini müsbət qiymətləndirən ATP sədri, bu sahədə PA-nın “Siyasi partiyalar və qanunvericilik hakimiyyəti ilə əlaqələr” şöbəsinin fəaliyyətini təqdir etdiyini diqqətə çatdırmışdır. YAP-nın VII qurultayında Prezident İlham Əliyev siyasi dialoğun genişləndirlməsini müsbət qiymətləndirmiş, ümidvar olduğunu bildirmişdir ki, ümummilli məsələlərdə yekdil mövqeyə bundan sonra da əməl ediləcəkdir. Məlumdur ki, siyasi partiyaların normal fəaliyyətinin təmin edilməsi, xüsusilə onların müvafiq ofislərlə təmin edilməsi üçün Preziden İlham Əliyev müvafiq göstəriş vermişdir. Bununla əlaqədar AZƏRTAC-a müsahibəsində Ədliyyə Nazirliyi Qeydiyyat və notariat baş idarəsinin rəisi İlqar Məmmədov bildirmişdir ki: “...bu gün Azərbaycanın siyasi palitrasında təmsil olunan bütün partiyaların normal fəaliyyəti üçün geniş imkanlar mövcuddur - qərargahla, texniki avadanlıqla təmin olunurlar..”. Təəssüf ki, Prezidentin göstərişinə zidd olaraq bu sahədə siyasi partiyalara differensial yanaşmanın şahid oluruq. Belə ki, Prezidentin göstərişinə uyğun olaraq Əməlak Məsələləri Dövlət Xidməti siyasi partiyalara ofislərin verilməsi üçün yerlər ayırıb və Azadlıq prospekti 161 “B” ünvanında yerləşən köhnə binada ümumi sahəsi 99,2 m2, səmərəli sahəsi 40 m2 olan, hər birinin sahəsi təqribən 10 m2 olan iç-içə dörd “otaqlı” belə bir “yer” Təkamül Partiyasına da təklif edilmişdi. Təbii ki, belə “ofis” siyasi partiyanın nəinki normal, heç elementar fəaliyyəti üçün məqbul deyildir. Bunu nəzərə alaraq Təkamül Partiyası rəsmi olaraq bu “ofisdən” imtina etmişdir. ATP bütün fəaliyyəti dövründə legitim fəaliyyət göstərmiş və göstərir, ölkəmizdə baş verən bütün ictimai-siyasi proseslərdə daim aktiv iştirak etmişdir və edir, ümummilli məsələlərdə daim dövlətin yanında olmuşdur və bu siyasətini davam etdirmək əzmindədir və s. Ona görə də, siyasi partiyalar ofislə, avadanlıqla təmin edilərkən Əməlak Məsələləri Dövlət Xidmətinin differensial yanaşmasının səbəbləri, bu zaman hansı “prinsipləri” əsas götürdüyü Təkamül Partiyası üçün aydın deyildir. Siayasi partiyanın səmərəli fəaliyyəti üçün müvafiq ofisin olması əsas məsələlərdən biridir. T.Qənioğlu Mərkəzi Şura üzvülərinin nəzərinə çatdırmışdır ki, partiya üçün müvafiq ofisin axtarışını davam etdirir.