Dərc edilib: 11-04-2021

http://www.nuh.az/28467-.html

Son 3 il - islahatlar, idarəetmə sistemində yeniləşmə və Böyük Qələbə mərhələsi

11.04.2021 16:04:47

LIVE

2018-ci il aprelin 18-də Prezident İlham Əliyevin andiçmə mərasimi oldu və onun qarşıdakı 7 il ərzində hansı məsələləri prioritet kimi irəli sürəcəyi hər kəs kimi siyasi müxalifət üçün də maraqlı idi.
İlham Əliyev birmənalı şəkildə qeyd etdi ki, növbəti illərdə çox ciddi islahatlar aparacaq, onları dərinləşdirəcək və vətəndaşların yaşayış səviyyəsi daha da yaxşılaşacaq. Həmçinin vurğuladı ki, korrupsiyaya, rüşvətxorluğa qarşı mübarizə bundan sonra da güclənəcək.

Prezident iqtisadi islahatlar və ordu quruculuğu, siyasi opponentlərlə münasibətlərin sağlam əsaslar üzərində qurulması və digər məsəslələrə də toxunmuşdu.
Bildirmişdi ki, seçki kampaniyası dövründə rəqiblərin səsləndirdiyi haqlı tənqidləri öz fəaliyyətində nəzərə alacaq, onların təkliflərini həyata keçirməyə çalışacaq. Eyni zamanda bildirmişdi ki, Azərbaycanın ərazi bütövlüyünün təmin edilməsi, münaqişənin qısa zamanda həlli onun üçün ən əsas prioritetdir. 
Bəs İlham Əliyevin növbəti dəfə prezident kimi and içməsindən ötən 3 il ərzində nələr baş verdi?
Bu gün görünən reallıq odur ki, İlham Əliyev andiçmə mərasimindəki nitqində verdiyi vədləri demək olar ki, böyük uğurla yerinə yetirməkdədir. Biz hər şeydən əvvəl siyasi hakimiyyət strukturunda ciddi institusional dəyişikliklərin şahidi olduq. Eyni zamanda artıq yeni dövrün tələbləri ilə ayaqlaşa bilməyən dövlət institutlarının daha dinamik və effektiv olanlarla əvəz edildiyini gördük. Bu zaman gənc, xaricdə təhsil almış, bilikli və bacarıqlı insanlar, peşəkar menecerlər hakimiyyət strukturlarında idarəçiliyə gətirildi. Bu proses hazırda da davam etməkdədir. Kommunist partiyasından bizə miras qalmış, yeni dövrün tələbləri ilə ayaqlaşa bilməyən, öz əməlləri ilə ölkədə inkişafın gedişini ləngidən, xalqın haqlı qınağı ilə üzləşən köhnə komanda modern və gənc kadrlarla əvəz edilməkdədir.
Xüsusilə qeyd edilməlidir ki, Prezident hakim komandanı yeniləyərkən partiya faktoruna yox, peşəkarlığa üstünlük verir. Dövlət idarəetməsinin hər pilləsində əsas prinsip kimi islahatların reallaşdırılması qəbul edilib. Biz dərin islahatlar gözləyirik. Bu, bütün sahələri əhatə etməlidir, dövlət idarəetməsi daha da təkmilləşməlidir.
Eyni zamanda ölkədə gedən siyasi islahatlar öz səmərəsini verməkdədir. İlk öncə qeyd edə bilərik ki, son dövrlərdə iqtidar-müxalifət dialoquna doğru mühüm və çox ciddi addımlar atılıb. Xüsusən də Prezidentin Administrasiyasında Siyasi partiyalar və qanunvericilik hakimiyyəti ilə əlaqələr şöbəsinin yaradılmasından və müvafiq quruma Ədalət Vəliyevin müdir təyin edilməsindən sonra bu struktur fəaliyyətini intensiv həyata keçirir. Bu, ölkədə siyasi mədəniyyətin formalaşması, ölkənin siyasi sisteminin güclənməsi, inkişafı istiqamətində bir prosesdir və hər kəs tərəfindən təqdir olunur. 
Son bir il göstərdi ki, Azərbaycan pandemiya ilə mübarizədə ön yerlərdən birini tutur. İlk gündən ölkədə pandemiya ilə mübarizəyə start verilib və çətin dövrdən daha az itkilərlə çıxmaq hədəf götürülüb. Təsadüfi deyil ki, bu gün Azərbaycan peyvənd olunmuş əhalinin faizinə görə MDB regionunda liderdir. Bu istiqamətdə dövlət səviyyəsində görülən işlər özünü rəqəmlərdə, müxtəlif statistikalarda ifadə edir.
Bundan əlavə, ölkədə aparılan vergi, bank-maliyyə, kənd təsərrüfatı, ekoloji təhlükəsizlik sahəsindəki islahatlar da təqdirəlayiqdir.  
Ötən dövr ərzində İlham Əliyevin Azərbaycan dövləti və xalqı üçün göstərdiyi ən böyük xidmət ərazilərimizin işğaldan azad edilməsidir. O, 44 günlük Vətən müharibəsinin qalibiyyətlə başa çatmasının əsas səbəbkarıdır. Vətən müharibəsi zamanı şərəflə yazılan Azərbaycanın Zəfər tarixi Müzəffər Ali Baş komandanın ordu və xalqı ilə birlikdə yaratdığı əsl qəhrəmanlıq dastanıdır. 30 illik həsrət cəmi 44 günə sona çatdı, xalqımız öz liderinin ətrafında yumruq kimi birləşdi və nəticədə "dəmir yumruq” düşmənin başına endirildi. Bu zəfər sonrakı min illər ərzində də Azərbaycanın şanlı tarixini bəzəyəcək.     
Təəssüf ki, Azərbaycan müharibə dövründə olduğu kimi, müharibədən sonra da xaricdəki anti-Azərbaycan qüvvələrlə mübarizə aparmalı olub. Həm informasiya cəbhəsində, həm də döyüş cəbhəsində aparılan mübarizə ölkəmizin, onun rəhbərinin gücünü göstərdi. Lakin hələ işlər bitməyib. Üstümüzə erməni lobbilərinin dəstəyi ilə daha güclü informasiya savaşçıları gəlməkdədir. Biz müharibənin ardından informasiya savaşını da, diplomatiya savaşını da qazanmaq məcburiyyətindəyik. Ona görə də hamımız ayıq-sayıq olmalı, bütün siyasi ambisiyalarımızı kənara qoyub, vətən naminə ümumi dövlət prinsipləri ətrafında sıx birləşməliyik.
Ümidvarıq ki, ölkədə gedən dərin islahatlar, qələbə əhvali-ruhiyyəsi, nəsil dəyişikliyi və idarəetmə sisteminə gətirilən yeniliklər İlham Əliyevə qarşıdakı illərdə daha böyük uğurlara imza atmağa imkan verəcək.    
Asim MOLLAZADƏ,
Azərbaycan Demokratik İslahatlar Partiyasının sədri,
Milli Məclisin Təbii ehtiyatlar, energetika və ekologiya komitəsinin sədr müavini

NUH informasiya agentliyi səhifəsindən çap edilib