Dərc edilib: 13-07-2021

https://www.nuh.az/29296-.html

Baş həkimi şantaj edən reket sayt rəhbəri həbs edildi - 2 min manat

13.07.2021 01:01:14

LIVE

Bakıda baş həkimi şantaj edərək 2 min manat alan sayt rəhbəri həbs edilib.


Sabunçu Rayon Prokurorluğundan “Qafqazinfo”ya verilən məlumata görə, “www.sheffaf.az” xəbər portalının baş redaktorunun 36 nömrəli Şəhər Poliklinikasının Baş həkimindən hədə-qorxu ilə pul tələb etməsi barədə müraciət daxil olub.

Aparılmış araşdırmalarla müəyyən edilib ki, qeyd edilən xəbər portalının təsisçisi və baş redaktoru Namik Əmrahov Sabunçu rayonu, 36 nömrəli Şəhər Poliklinikasının Baş həkimi Ramidə İbrahimovaya özünü “www.azinfo.tv” və www.sheffaf.az xəbər portalının rəhbəri kimi təqdim etməklə barəsində kütləvi informasiya vasitələrində rüsvayedici məlumatlar yayacağı ilə hədələyərək 2018-ci ildən etibarən ondan dəfələrlə ümumilikdə 2 min manat məbləğində pul tələb edərək alıb.

Faktla bağlı cinayət işi başlanıb, Namik Əmrahov Cinayət Məcəlləsinin 182.2.2 (təkrar törədilməklə hədə-qorxu ilə tələb etmə) və 308.1 (vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.

Hazırda iş üzrə istintaq davam edir.

NUH informasiya agentliyi səhifəsindən çap edilib