Lənkəran Dövlət Universitenin tərbiyə işləri üzrə prorektoru əvəzi vəzifəsində işləmiş, biologiya elmləri üzrə fəlsəfə doktoru, tələbədən rüşvət aldığına görə həbs edilmiş Qorxmaz Ağayev yenidən universitetə müəllim kimi işə qayıdıb.  Bu barədə SERHED.İNFO-ya məlumat verən mənbənin sözlərinə görə, Qorxmaz Ağayev bir müddətdir ki, universitetdə baş müəllim kimi fəaliyyət göstərir.

Məsələ ilə bağlı, Qorxmaz Ağayevin özü ilə əlaqə saxlasaq da, o, məlumat vermək əvəzinə hədə-qorxu gəlməkdən çəkinmədi. SERHED.İNFO olaraq məlumatı dəqiqləşdirmək üçün, Lənkəran Dövlət Universitetə ünvanladığımız sorğuda isə məlumat öz təsdiqini tapır.

Universitetin verdiyi cavabı olduğu kimi diqqətinizə çatdırırıq:

Qorxmaz Ağayev Azərbaycan Respublikası Baş Prokurorluğunun onun barəsində cinayət işi qaldırması səbəbindən 19 aprel 2013-cü il tarixində işdən azad edilmişdir. Məhkəmənin onun barəsində çıxardığı sonuncu 28.08.2015-ci il tarixli qərarı ilə Azərbaycan Respublikası Cinayət Məcəlləsinin 178.2.3-cü maddəsi ilə təqsirli bilinərək ona 3 (üç) il müddətinə azadlıqdan məhrum edilmə cəzası təyin edilmişdir. Cəzaçəkmənin əvvəli 15.04.2013-cü il tarixə, sonu isə 15.04.2016-cı il tarixə müəyyən edilmişdir.
23.09.2015-ci il tarixə 6 ay 22 gün çəkilməmiş cəzası qalmışdır. Bakı Şəhər Xəzər Rayon Məhkəməsinin 23.09.2015-ci il tarixli qərarı ilə Qorxmaz Ağayevin İstintaq Təcridxanasında müəyyən olunmuş birgəyaşayış və daxili intizam qaydalarına riayət etdiyini, üzərinə düşən
işləri və verilən tapşırıqları vaxtında yerinə yetirdiyini, aparılan islah və mədəni-kütləvi tədbirlərdə fəal iştirakını, psixoloji xarakteristikasına görə dayanıqlı, intellektual səviyyəsi yüksək, səbrli,
hərəkətlərində diqqətli, ictimai faydalı əməyə münasibəti müsbət, kriminal aləmin adət və ənənələrinə münasibəti mənfi olduğunu, iş yerini təmiz saxladığını, törətdiyi cinayət əməlindən peşman olduğunu və təyin olunmuş azadlıqdan məhrum etmə cəzasının yarısından çoxunu çəkdiyi nəzərə alaraq cəzadan şərti olaraq vaxtından əvvəl azad olunmasını məqsədəmüvafiq hesab etmişdir.
Azadlığa çıxdıqdan sonra Qorxmaz Ağayev pedaqoji fəaliyyətini davam etdirmək məqsədilə əvvəl işlədiyi Lənkəran Dövlət Universitetinə işə götürülməsi xahişi ilə müraciət etmişdir. Rektorun 20 oktyabr 2015-ci il tarxli əmri o, “İqtisadi informatika və ekologiya” kafedrasında gələcəkdə müsabiqədən keçmək şərtilə baş müəllim vəzifəsinə təyin edilmişdir. Qeyd olunmalıdır ki, mövcud təhsil qanunvericiliyində əvvəllər məhkum olunmuş şəxsin müəllim kimi işləyə bilmək imkanın olub-olmaması məsələsi öz əksini tapmamışdır. Müəllim kimi fəaliyyət göstərib-göstərməməsi barədə qərar ancaq məhkəmə tərəfindən verilə bilər. Məhkəmənin Qorxmaz Ağayev barəsində verdiyi qərarda onun təhsil müəssisələrində fəaliyyətini davam etdirməsinə heç bir qadağa qoymadığından, o, öz konstitusiya hüququndan istifadə edərək pedaqoji fəaliyyətini əvvəllər çalışdığı ali təhsil müəssisəsində davam etdirir. Həmçinin bildiririk ki, müəllimlərin işə götürülməsi məsələsi ali təhsil müəssisələrinin səlahiyyətindədir.

Xatırladaq ki,  Q.Ağayev 2013-cü ilin aprel ayının əvvəllərində universitetin «iqtisadiyyat və idarəetmə» fakultəsinin 3-cü kurs tələbəsi Mirzəzadə Kamil Pəhlivan oğlunun xəstəliyi ilə bağlı akademik məzuniyyət verilməsinə dair müraciətinə əsasən, sonuncudan qeyd olunan məzuniyyətin verilməsinə görə 2013-cü ilin mart ayının axırlarında 500  manat pulu istəyərək, 15 aprel 2013-cü il tarixdə saat 16 radələrində Lənkəran şəhəri, Həzi Aslanov xiyabanı, 50 ünvanında yerləşən universitetin inzibati binasındakı xidməti otağında 400 manat pulu ondan rüşvət kimi alıb.

Cinayət Məcəlləsinin 178.2.3-cü (dələduzluq) və 311-ci (rüşvət alma) maddələrinə əsasən təqsirli bilinən Q. Ağayev Lənkəran Ağır Cinayətlər Məhkəməsinin hökmü ilə 2 il müddətinə rəhbər və maddi-məsul vəzifə tutmaq hüququndan məhrum edilməklə 6 il müddətinə azadlıqdan məhrum edilib. Sonradan Şirvan Apellyasiya Məhkəməsinin qərarı ilə Q.Ağayevin cəzası 6 ildən 3 ilə endirilib.  Serhed.info

 

NUH.az