Siyəzəndə 5 aylıq körpənin ölümünə bais olan kimdir? - FOTO

Körpənin anası Həlimə Əzimovanın İstipress-ə verdiyi məlumata görə, Cahid həkim məsuliyyətsizliyi ucbatından dünyasını dəyişib. Bildirir ki, bu il mart ayının 19-dan 3 yaşlı oğlu Rauf soyuqdəymədən əziyyət çəkdiyi üçün Siyəzən Regional Müalicə Dioqnostika Mərkəzində uşaqla birgə qalıb. Ana   Raufun  vəziyyətinin ağır olması səbəbindən 5 aylıq körpə oğlu  Cahidi də özü ilə xəstəxanaya gətirməli olub. 

   

Martın 19-dan böyük oğlunun müalicəsi  ilə əlaqədar Siyəzən Regional Müalicə Dioqnostika Mərkəzinin pediatriya şöbəsində  qalan Həlimə Əzimova 2- ci oğlu Rauf sağalana yaxın 5 aylıq Cahidin də xəstələndiyini, həkim Mənsurə Ağayevanın  soyuq və laqeyd münasibəti ucbatından uşağın vəziyyətinin getdikcə pisləşdiyini  deyir. Onun sözlərinə görə, uşağın nəcisindən qan gəlməyə başlayıb və vəziyyəti kritikləşib. Bundan sonra 5 aylıq Cahidi K.Fərəcova adına Elmi-Tədqiqat Pediatriya İnstitutuna  aparıblar və müalicəyə başlayar- başlamaz körpə orada ölüb. Cahid Bakıda keçindikdən sonra Əzimovlar ailəsi Siyəzənin hüquq -mühafizə orqanlarına deyil, Quba prokurorluğuna rəsmi şəkildə şikayət edib. Körpənin meyiti burada  tibbi ekspertizadan keçirilib və prokurorluq araşdırmalara başlayıb.

Ata Mazan Əzimov deyir ki, uşağımın həkimi olmuş Mənsurə Ağayeva şikayəti geri almaq, məsələni ictimailəşdirməmək üçün ona 1500 manat pul təklif edib ki, səsini çıxarmasın. " Mənsə razılaşmamışam, uşağımın nahaq ölümünə bais olan həkimin ciddi cəzalandırılmasını tələb edirəm" - deyə körpənin atası bildirir.

Əzimovlar ailəsinin ittihamlarına  Siyəzən Regional Müalicə Dioqnostika Mərkəzinin pediatrı Mənsurə Ağayevadan münasibət öyrəndik. Mənsurə həkim barəsində ailənin dediklərini qəti inkar edərək deyilənlərin onun həkim imicinə mənfi təsir etdiyini dedi. "Nə pul təklif etmək? Mən şikayəti geri almaq  üçün Mazan Əzimova elə bir söz deməmişəm ki, mənə 1500 manat pul versin. Bu, yalandır, əksinə, özü mənə deyib ki, pul ver, şikayətimi geri götürüm? Özü dediyini mənim barəmdə deyir, qəti doğru demir."  

Mənsurə Ağayeva bildirib ki,  5 aylıq Cahidin mədə- bağırsaqla bağlı problemi olub. "Mən bacardığım müalicəni etmişəm, ana uşağa qatılaşdırılmış süd və köhnə ana südü verib, ondan sonra vəziyyəti ağırlaşıb."-deyə həkim sözlərinə əlavə edib. Uşağın nəcisindən qan gəldiyini görüncə isə, Mənsurə Ağayeva onu  K.Fərəcova adına Elmi-Tədqiqat Pediatriya İnstitutu  göndərdiklərini, amma bagırsaq keçilməzliyindən əziyyət çəkən 5 aylıq Cahidin Bakıda keçindiyini bildirdi.

Faktla bağlı  Quba prokurorluğunda araşdırma aparılır.