“Ərzağın tullantı kimi atıldığı vaxtda, 870 milyon insan aclıqdan əziyyət çəkir”

Bakıda keçirilən IV Ümumdünya Mədəniyyətlərarası Dialoq Forumunun üçüncü günündə sessiyalardan biri “Ərzaq Təhlükəsizliyi və dayanıqlı cəmiyyət naminə mədəniyyətlərarası dialoq: Davamlı inkişaf və sülhün təmin olunması üçün əsas elementlər” mövzusuna həsr edilib.

"Qafqazinfo" xəbər verir ki, BMT-nin Ərzaq və Kənd TəsərrüfatıTəşkilatının (FAO) xoşməramlı səfiri Leyla Əliyeva bildirib ki, tarix boyu Azərbaycan mədəniyyətlərin, dinlərin və sivilizasiyaların qovuşduğu məkan olub:

"Azərbaycandakı bütün xalqlar, istər müsəlman, istər yəhudi, istərsə də xristianlar sülh şəraitində yan-yana yaşayıblar. Bunu heç kəs mədəniyyətlərası dialoq kimi görməyib.  Bu kimi qarşılıqlı əlaqələr gündəlik həyatın bir hissəsi olub. Bakı bu gün mədəniyyətlərarası dialoq üçün mərkəzlərdən birinə çevrilib. 

Bu plenar sessiyada çıxışdan olduqca məmnunam. Mövzu mənim üçün FAO-nun xoşməramlı səfiri və ətraf mühit carçısı kimi əhəmiyyətlidir. Ərzaq təhlükəsizliyi, sülh və davamlı inkişaf arasında birbaşa əlaqə bu tədbiri olduqca zəruri edir. Hamımız bilirik ki, mədəniyyətlərarası dialoq irqçilik və zorakılığın formal səviyyədə aparılmasına qarşı mühüm əks qüvvədir. Bununla belə, bunun miqyası tolerantlıq, birgə yaşayış ideyalarının təşviq olunması ilə yanaşı digər işlərin də görülməsini ehtiva edir. 

Əslində, çox təəssüflə qeyd etməliyəm ki, 21-ci əsrdə 870 milyon insan dünyada aclıqdan və az qidalanmadan əziyyət çəkir. Bu elə bir vaxtda baş verir ki, dünyada ərzağın üçdə bir hissəsi tullantı kimi atılır. İqlim dəyişikliyi bu vəziyyəti daha da gərginləşdirir. 

Ərzağın bölüşdürülməsi özü özlüyündə mədəniyyətlərarası dialoqdur. Çünki mətbəx mədəniyyəti insanlara bir araya gəlmək və strereotipləri aradan qaldırmaq üçün bir vasitədir. 

Vaxt artıq yetişib, beynəlxalq ictimaiyyət öz səylərini birləşdirərək ərzaq təhlükəsizliyi və qidalama məsələrini mədəniyyətlərarası dialoqun yaxşılaşdırılmasında istifadə etsin". 

    NUH.az