Prokuror baş redaktora 8 il iş istədi

Bakı Ağır Cinayətlər Məhkəməsində jurnalist Fikrət Fərəməzoğlunun cinayət işi üzrə məhkəmə prosesi davam etdirilib.

"Qaynarinfo" xəbər verir ki, hakim Eldar Mikayılovun sədrliyi ilə keçirilən prosesdə prokuror F.Fərəməzoğlunun 3 il jurnalist fəaliyyətindən məhrum edilməklə 8 il azadlıqdan məhrum edilməsini istəyib.

İyunun 9-da keçiriləcək prosesdə F.Fərəməzoğlu son söz deyəcək.

Qeyd edək ki, Fikrət Fərəməzoğlu Cinayət Məcəlləsinin 182-ci maddəsi ilə (hədə-qorxu ilə tələb etmə) ittiham olunaraq həbs olunub. 

Daxili İşlər Nazirliyinin (DİN) mətbuat xidmətinin yaydığı məlumata görə, Xətai rayonunda yerləşən restoranlardan birinin sahibi olan paytaxt sakini DİN-ə müraciət edərək İbişbəyli Fikrət Fərəməz oğlunun rəhbəri olduğu “Jam.az” və digər saytlarda obyektinin işgüzar nüfuzuna xələl gətirən materiallar yaydığını, həmin yazıları saytdan çıxarmaq müqabilində bu ilin aprel ayında ondan 1000 manat aldığını və gələcəkdə bu səpkili materialların yazılmaması üçün hər ay 5000 manat tələb etdiyini bildirib:

"Aparılan araşdırmalarla fakt təsdiqini tapıb. 2016-cı il iyunun 30-da Fikrət Fərəməzoğlu şikayətçidən 3000 manat alarkən saxlanılıb".

Jurnalist isə bu ittihamları qəbul etməyərək, şərlənərək həbs olunduğunu bildirir. 

  NUH.az