Mənsimovdan Ələkbərova ikinci zərbə - “Bu, saxtakarlıqdır”

“Palmali” Şirkətlər Qrupunun sahibi, azərbaycanlı iş adamı Mübariz Mənsimov Rusiyanın “Lukoil” şirkətini bir daha məhkəməyə verir. 

“Qafqazinfo” xəbər verir ki, Mənsimov “Anadolu Agentliyi”nə açıqlamasında bildirib ki, bu ilin iyulun 17-də İngiltərədəki Ali Arbitraj məhkəməsinə müraciət edərək “Lukoyl”a bağlı Litasco şirkətinə 2 milyard dollarlıq təzminat davası açıblar: “Bu qorxu səbəbindən Lukoyl Litasco-nu satıb xilas olmaq istəyir. Birjaya açıq olduğu üçün bu, saxtakarlıqdır”. 

Mənsimov Palmali ilə Litasconun 2005-ci ildə “10+5” illik razılaşma imzaladıqlarını və sazişə əsasən şirkətdən ümumi dəyəri 440 milyon dollar olan gəmi aldıqlarını, lakin şirkət sazişin şərtlərinə əməl etmədiyi üçün 4 milyard dollar itirdiklərini bildirib. 

İş adamı hər iki şirkətin 2015-ci ildə yeni saziş üçün bir araya gəldiklərini qeyd edib:

“Hüquqi əsası olmayan bu saziş layihəsini razılaşmanın əldə olunması kimi təqdim etməyə çalışırlar. Lukoyl bu sənəddən Litasconu baha qiymətə satmaq və hissə dəyərinin birjada düşməməsi üçün istifadə edir.

Bizim 4 milyard dollara yaxın itkimiz var. Sazişə uyğun olaraq dəyən zərəri ödəmək məcburiyyətindədirlər. 2010-cu ildə Lukoylla Xəzər dənizindəki daşınma üçün imzaladığımız 10+10 illik ikinci anlaşmanı isə təktərəfli pozublar. Bunun üçün də Lukoylu ikinci dəfə məhkəməyə verməyə hazırlaşırıq. Lukoylun tələsik Litasconu satmağa çalışması bizə təsir etməz, borcumuzu təqib edəcəyik”. 

  NUH.az