Pirallahının “padişahı” Vasif İmanov

Yəqin ki, saytımızdan və digər mətbu orqanlardan 18 ay öncə -02.09.2016-cı il tarixdə  Pirallahı rayon ərazisində baş vermiş faciəvi hadisə barədə xəbər tutmusunuz. Söhbət YAP-ın Pirallahı Rayon Təşkilatının sabiq sədri Manaf  Manafovun  xidməti maşını ilə törədilmiş ölüm hadisəsindən gedir. Nə yazıq ki, bu ölüm hadisəsi ilə bağlı ayrı-ayrılıqda dörd müstəntiqin  apardığı 7 aylıq istintaq və 11 aylıq məhkəmə gedişatı, günahkarların  tam cəzalandırılması mərhələsinə gəlib çatmamışdır.

 Tərəflərin bitib-tükənməyən mübahisəsi bu gün də davam edir. Biz də bu səbəbdən, Ovqat.com oxucularını hadisənin gedişatı ilə tanış etmək üçün, tərəfləri  bir  daha  danışdırmaq qərarına gəldik. İlk qonağımız şükayətçi Cəmşid İrzaquliyevdir: 

   -Cəmşid müəllim, hal hazırda məhkəmənin gedişatı nə yerdə?

   -Bilindiyi kimi,  11 aydır ki məhkəmə davam edir. Hadisədən sonrakı bu 18 ay ərzində  işlərin gedişatı bizləri nə qədər qane etməsə də (yəni sir pərdəsi tam qalxmasa da) , 28 dekabr 2017-ci il tarixdə ilkin məhkəmə instansiyası,  yəni Pirallahı rayon məhkəməsi  öz işini yekunlaşdırıb. Məhkəmə Dövlət ittihamçısının  israrla özünü  günahsız bilən təqsirkara istədiyi 5 il 9 ay iş əvəzinə, 5 il iş verilməsi barədə qərar çıxardı. Onu da diqqətinizə  çatdırım ki,  ilkin istintaqın təqsirkara şamil etdiyi, Cinayət məcəlləsinin 263.2 maddəsində belə bir ağır hadisə üçün yetərli cəza nəzərdə tutulmamışdır. Bu barədə mən, görüşlərimdə  fikirimi  Baş Prokrororun Birinci müavini  Rüstəm Usyubova,  Daxili İşlər Nazirliyinin Baş İstintaq və  Təhqiqat İdarəsinin sabiq rəisi,  məhrum Sərvər Mehrəliyevə  də  bildirmişdim. Axı, necə ola bilər, hadisə ilə bağlı bütün rəylərdə günahkar sürücü bilinsin (hətta təqsirkar da öz günahını dəfələrlə etiraf etsin), amma ona bunca az iş nəzərdə tutulsun? Bu ədalət deyil, axı. Ona görə də bu məsələdə ciddi cəza nəzərdə tutulmadığı üçün, trafik canavarı tüğyan edir. Hər ikisi mənimlə razılaşdı. Bəs sonuç? Sonuç isə göz qabağında. Bu barədə mən fikirlərimi Cənab Prezident başda olmaqla, bütün aidiyyatı dövət orqanlarına  dəfələrlə yazılı olaraq  bildirmişəm. Yazmışam; gəlin elə edək ki, bir də kimin isə canı yanmasın, körpələr başsız qalmasın. Bu belə davam edə bilməz, axı. Təkrar edirəm; necə ola bilər ki, birisi içkili, çəkili  və nə bilim yol hərəkət qaydalarını  bilmədən, ona əməl etmədən sükan arxasında oturub, kiminsə həyatına son qoysun və sonra “hadisədi” deyib, hakim ona yüngülləşdirici cəza tətbiq etsin.

-Bəs qalan  günahkarlar, necə, cəzalandırıldılarmı?  Xüsusən də  hadisəni törədən –maşının təhkim olunduğu şəxs.  Bildiyimizə görə, onlar sıradan adi vətəndaşlar deyildi. Onlar Pirallahı rayon İcra hakimiyyətinin işçiləri olublar, axı?

 -Bəli. Bax, bəla da burasındaır ki, onlar Pirallahı rayon İcra Hakimiyyəti Başçısının məmurları olublar və onların da başında  Vasif İmanov durur. Bizə bəlli olan və sizin də bildiyiniz kimi, maşında olan məmurlardan biri hadisəni törədən maşının təhkim olunduğu YAP Pirallahı rayon təşkilatının keçmiş sədri və rayonun  “RJO” deyilən qurumunda məsul vəzifə tutan Manaf  Manafov və  İcra başçısının köməkçisi Həsən Niftəliyevdir ki, onlar hadisə anında  oğluma heç bir ilkin yardım göstərməyə səy göstərməmiş, hadisə yerindən uzaqlaşmışlar. Sonradan tülkü kimi kənardan bizləri seyr etmişlər. 

 Xatırladım  ki, biz hələ o vaxt,  hadisənin üçüncü günü bu hadisə ilə  bağlı Vasif İmanovun qəbulunda olmuşduq. Vasif İmanov bizimlə görüşdə ilk olaraq başladı ki, eşitmişəm,  hadisədi olub,  gəlin razılaşaq və bu hadisəni yuxarılara çatmasına şərait yaratmayaq.   Yəni biz Başçının hadisəyə baxışından və qeyri-insani  davranışlarından da gördük ki, bu şəxs yerində olmayan adamdır.  Etdiyimiz şikayətlərdən sonra, bunca müraciətlərimizə və hadisəni ictimailəşdirməmizə rəğmən,  Manafın YAP Pirallahı rayon təşkilatının sədrliyindən uzaqlaşdırılmasına rəğmən, hələ  onu təşkilatın idarə heyətində və şura üzvülüyündə, eyni zamanda  İcra Hakiimiyyətinin “RJO” deyilən qurumunda rəhbər vəzifədə, Niftəliyev Həsəni isə özünün köməkçisi vəzifəsində saxlayır.   O bununla da demək istəyir ki, mən heç kimi saymıram və Pirallahının “allahıyam”. 

Digər tərəfdən də o bu davranışları ilə  Cənab Prezident rəsmi toplantılarda dəfələrlə “qudurğanlıq edən istənilən məmur və məmur övladları ən ağır cəza ilə cəzalandırılmalıdır” xəbərdarlıqlarına  da  sayqısızlıq etmişdir. Vasif İmanov bununla da Cənab Prezidentin gördüyü bunca respublika əhəmiyyətli  taleyüklü məsələlərə yerlərdə kölgə düşürməklə məşqul olmuşdur. Onun bu sayqısızlıqları rayon ictimayyətinə də sirayyət etmişdir Çünki adı çəkilən məmurların özbaşınalıqları və çirkin əməlləri rayonda hər kəsə bəllidir. Bu səbəbdəndir ki, Pirallahı Respublika rayonları içərisinda Prezident apartına edilən şikayətlərə görə, ən çox adı hallanan rayonların siyahısında yer alır

 -Cəmşid müəllim, bu barədə harasa fikirlərinizi  çatdırmısınızm?

-Demək olar ki,  bütün aidiyyatı orqanlara, Cənab Prezidentə, Birinci Vitse- Prezidentə,  Baş Prokrorluğa, Daxili İşlər Nazirliyinə, Ədliyyə Nazirliyinə, Yeni Azərbaycan Partiyasına, hətta Pirallahının icra hakimiyyətinə belə, bu 18 ayda minlərcə vərəq müraciətlər göndərilmişdir. Məsələ dəfələrlə mətbuatda ictimailəşdirilmişdir. Təssüf ki, Vasif İmanov ölkənin nüfuzuna xələl gətirən bu addımları atmağa bizi məcbur etmişdir.  Daima  Dövlət və dövlət başçısına sadiq,  həm keçmiş məmur və həm də YAP üzvü olaraq biz bilirik ki, bu addımlar hakimiyyətə baş ucalığı gətirməz. Lakin bayaq dedim, sanki biriləri tərəfindən  biz  buna məcbur edilirik. 

-Ortada bir ailə körpə uşaqla başsız qalıb. Onların gələcəkdə maddi təminatı ilə bağlı hadisəni törədənlərdən bir tələbdə bulunmusunuzmu?

-Bu günə kimi, xeyir. Sadəcə olaraq mən cinayət işinin yekunlaşmasını gözləyirəm. Təbii ki, biz bununla bağlı  hadisəni törədilməsində  vasitə olmuş  maşının mənsub olduğu təşkilata və xidməti istifadəsində olan şəxsə qarşı  mülki idda qaldıracağıq. Yəni qanun çərçivəsində.

-Cəmşid müəllim, onların bu davranışları bir yana, insanlıq naminə, heç oldumu ki, Vasif İmanov  başda olmaqla bu adamlar hadisədən sonra, üzrə gəlsinlər və sizə yanaşıb bir təsəlli versinlər?

 -Olmadı.  Bu məsələdə Vasif İmanov başda olmaqla onun məmurları ən böyük sayqısızlığı  etmiş oldular. Onların bu qeyri-insanı davranışları, onların nə qədər harınladıqlarını bir daha sübut etmiş oldu. Həyatda heç kim ölümdən sığortalanmayıb. Gec-tez onlar da bu imtahan qarşısında aciz duruma düşəcəklər. Ən dəhşətlisi isə, belə adamların bir rayona başçılıq etməsi və məsul vəzifələrdə yer almalarıdır. Bu adamlar kimdilər, kimin nəyidirlər, məni qəti maraqlandırmır. Ən əsası odur ki, onlar  insanlıqdan çox uzaqdırlar.      

-Sizcə, Manaf Manafov kimisinin Vasif İmanovla nə bağlılığı ola bilər ki, bunca dirənişlərə rəğmən onu vəzifədə saxlasın və qorusun? 

-Yəqin ki, belə bir cinayətkarın önəmi Vasif İmanov üçün ökə çıxarlarından dəyərlidir.  Belə olmasa idi, siz demişkən,  bunca şikayətlərə rəğmən onu hələ də vəzifədə saxlamazdı.

-Sonda ölkə başçısına və  Birinci Vitse-Prezidentə  bütün bunlarla bağlı təkrar nə isə  demək istərdinizmi?

-Öncə bir vətəndaş olaraq işin icraatda olduğu Apellyasiya məhkəməsindən Ədalət istəyirəm. Konistitsion hüquqlarımın bərpasını istəyirəm. Cənab Prezidentin xəbərdarlıqlarına  Vasif İmanovun sayqı göstərməsini istəyirəm. Mən Birinci Vitse Ptrezidentdən bir ana olaraq oğlumun başsız qalmış 9 aylıq qızının, ailəsinin təsəllisi üçün, bu insanlara layiq olduqları yerlərini göstərilməsini istəyirəm.. 

Bayaq qeyid etdim. Mən Nazirlər Kabinetinin strukturlarının birində məmur olmuşam. Mən nə qədər dərdimlə uğraşsam da. ölkənin taleyüklü məsələlərində  kənarda qalmaram. Bu yaxınlarda Beynəlxalq Mətbuat Mərkəzində Eldar Namazovun sədirliyi ilə  Deportasiya Qurbanları Cəmiyyətinin Cənab Prezidentin namizədliyinin dəstəklənməsi ilə bağlı keçirilən konfransda, təklifə  ilk münasibət bildirən də özüm olmuşam. Bu mənim hadisələrə düzgün yanaşmamdan  və ölkəmizin gələcəkdə də ayaqda qalmasından doğan bir istək idi.

 İndi mən Vasif İmanovdan soruram, sən bu tədbirə nə ilə gedirsən? Manaf kimi saxtakarı  vəzifədə saxlamaqla, ictimayyət arasında ümidsizlik və inamsızlıq toxumu səpməkləmi?

 Ümid edirəm ki, Cənab Prezident  və Birinci Vitse –Prezident sonda Vasif İmanov kimi  etimaddan sui-istifadə edib, iqtidarın nüfuzuna öz yarıtmaz fəaliyyətləri ilə xələl gətirən məmurlara, layiq olduqları yeri göstərəcəklər...

Ovqat.com