Qiyməti 16 mindir - Azərbaycanda istehsal edilib

Yerli avtomobil markası olan "Xəzər" gələn aydan istehsal etdiyi avtomobillərin satışına başlayır. "Qafqazinfo" xəbər verir ki, bu barədə məlumatı "Azərmaş" ASC-nin idarə heyətinin sədri Emin Axundov verib.

O bildirib ki, Neftçala Sənaye Məhəlləsində yerləşən “Azərmaş” ASC və “İran Khodro” şirkətinin birgə istehsal etdiyi avtomobillərin satışına gələn aydan başlanılacaq. Belə ki, növbəti ayda bazara 300 avtomobil çıxarılması nəzərdə tutulub.

"Zavodda "Dena", "Rana", "Soren", "Samand" markalı avtomobillər, eləcə də "Peugeot"un bir sira modelləri istehsal ediləcək. Zavodun istehsal gücü ildə 10000 avtomobil təşkil edir. Gələcəkdə istehsal edilən həmin avtomobillərin Ukrayna, Rusiya və Mərkəzi Asiya bazarlarına çıxarılması gozlənilir.

E.Axundovun sözlərinə görə, hələ ki avtomobillərin ehtiyat hissələri zavoda idxal olunsa da, gələcəkdə həmin hissələrin də burada hazırlanması nəzərdə tutulub. Maşınların mühərrikinin  həcmi 1,7 l-dir, qiymətləri isə 14-16 min arasında dəyişir.

Avtomobillərin ilk sifarişçisi İqtisadiyyat Nazirliyi olub. Belə ki, nazirlik zavoda 10 ədəd 14 minlik avtomobil sifariş verib.