Çexiya Müdafiə Nazirliyi ilə Əhmədzadələri nə birləşdirir?

Hər şeyin üstü yavaş-yavaş açılır. Məlum olur ki, “Meliorasiya və Su Təsərrüfatı” ASC-yə illərlə dövlətin ayırdığı pullar sədr Əhməd Əhmədzadənin Britaniyada biznes qurmasına xərclənib. Dövlətin təftiş və araşdırması üçün faktlardır, istintaqa zəmindir. Kimsə bu xalqı aldada bilməz, kimsə inandıra bilməz ki, Əhmədzadənin oğlu Cuma Əhmədzadə xüsusi istedada malik biznesmendir, alnının təri ilə İngiltərədə özünə iş qurub.

Bu nağıllar çoxdan köhnəlib, təzəsini danışın. Xalq yaxşı bilir ki, heç bir qeyri-adi biznes qabiliyyəti olmayan, fərqli ideyalarla öz zəhməti hesabına qabağa getməyən məmur uşaqlarından biri də Əhmədzadənin oğludur.

Nə işdirsə, həmişə ən yaxşı biznesi qurmağı bu məmur uşaqları bacarır, başqaları beyinsizdir, savadsızdır, əllərindən bir iş gəlmir, təkcə bunlarınkı dahidirlər.

Əlbəttə, xalqdan, dövlətdən, büdcədən oğurlanmış pullar, “Meliorasiya və Su Təsərrüfatı” ASC-nin görəcəyi işlərə ayrılan vəsaitlərdir Əhmədzadənin oğlu Cuma bəyin cibində, İngiltərədə bizim pullar hesabına kef çəkməkdədir.

Əgər Cuma hansısa kənddə birinin oğlu olsaydı, indi Britaniyada biznes qura bilməzdi. Çünki onun buna nə imkanı, nə istedadı çatardı.

Sadəcə, bioloji cəhətdən bəxti gətirib ki, əli korrupsiyaya bulaşmış, ölkənin meliorasiya təsərrüfatını talan etmiş Əhməd Əhmədzadənin övladıdır. Vəssalam.

Hə, ikinci bəxti ondan gətirib ki, ölkənin bir nömrəli bankiri, manatın qətlinə fərman verənlərdən olan, Azərbaycanın maliyyə-valyuta sisteminin “anasını ağladan”, adı uzun müddət Suriyanın bir şirkəti ilə Avstriyadakı rüşvətlə bağlı məhkəmə skandalında hallanan Mərkəzi Bank sədri Elman Rüstəmovun kürəkənidir.

Bu qədər, ata və qaynata sarıdan yarıyan Cuma əfəndi dövlətin milyonlarını Londona daşıyıb, həbsdəki bankir Cahangir Hacıyev kimi özünə şirkətlər qurub.

Həmin sənədləri və faktları təqdim etməzdən əvvəl sadəcə adi bir sual yaranır və bu məqaləni oxuyan Əhmədzadənin işçiləri, E.Rüstəmovun əməkdaşları da pıçıltı ilə də olsa bir-birinə yəqin ki sual edəcəklər – bu milyonlar hardandır, kimin hesabınadır, hardan əldə edilib?!

Görəsən Əhmədzadənin və Rüstəmovun 500-800 manat arası maaşa işləyən işçiləri nə düşünürlər? Doğrudanmı Cuma onlardan istedadlı, bacarıqlı, fərasətlidir?

Bu barədə sənədləri araşdırmaçı jurnalist Cavanşir Həsənli Feysbuk-dakı səhifəsində paylaşıb. Araşdırmaya görə, 2015-ci il devalvasiyasından sonra kredit bataqlığında çabalayan Azərbaycan əhalisindən fərqli olaraq, bu qərara imza atan Milli Bank rəhbəri Elman Rüstəmovun ailə üzvlərinin sərvətləri birdən-birə bir neçə dəfə artıb.

Daha dəqiqi, o və qudası Əhməd Əhmədzadə övladları vasitəsi ilə xaricdəki biznes imperiyasının sərhədlərini genişləndiriblər. Bu imperiyanın sərhədləri isə Londondan başlayıb Çexiyada bitir. Hətta iş o yerə çatıb ki, qudalar Çexiya Müdafiə Nazirliyinin balansındakı əmlakı da alıblar.

Jurnalistin araşdırmasına görə, Əhməd Əhmədzadənin oğlu və onun həyat yoldaşı olan Elman Rüstəmovun qızı Günel Rüstəmova uzun müddətdir ki, Londonda yaşayırlar. İddia olunur ki, onlar Avropadakı böyük sərvətə Azərbaycandakı korrupsiya hesabına sahibləniblər.

Məlumata görə, onların Britaniyada sahib olduqları “Gyunel Limited” şirkəti 2005-ci ilin 28 aprelində Londonda qeydiyyatdan keçib və 5438890 saylı lisenziya nömrəsi alıb (Qeydiyyat ünvanı: Basement 32 Woodstock Grove, London, Uk, W12 8LE).

2010-cu ilin 26 oktyabr tarixinə qədər “Yosma LTD” adı ilə fəaliyyət göstərən şirkət 2006-cı ilin avqustun 21-də Elman Rüstəmovun qızının adına rəsmiləşdirilib.

2010-cu ildən bəri “Gyunel Limited” adı ilə fəaliyyətdədir. Şirkətin maliyyə sənədlərinə görə, 2008-ci ildə onun sərvəti heç 10 min funt sterlinq olmayıb. 2014-cü ildə şirkətin mal varlığı 1 milyon 102 min 789 funt sterlinq olub.

Yayılan sənədlərə görə, 2013-cü ilin sonlarında Ə. Əhmədzadənin oğlu və E. Rüstəmovun qızı Çexiyada otel açmaq qərarına gəlirlər. Onlar Çexiyanın Lipno gölü sahilini seçirlər.

2014-cü ilin may ayının 11-də Cümə Əhmədzadə Çexiyanın Müdafiə Nazirliyi ilə bu ölkənin hərbi qüvvələrinə məxsus binanın alınması barədə müqavilə bağlayıb. Müqaviləni Çexiya Müdafiə Nazirliyi adından cənab Luboşem Hajdukem imzalayır.

Müqaviləyə görə, Çexiya Müdafiə Nazirliyi Lipno gölü sahilindəki istifadəyə yararsız binanı C. Əhmədzadəyə satır. C. Əhmədzadənin Lipno ilə bağlı layihəsi nə az, nə çox – düz 150 milyon çex kronu, yəni təxminən 7 milyon dollar təşkil edir. \\hurriyyet.org\\