Tanınmış kardioloqdan oruc tutanlara xəbərdarlıq

Türkiyənin məşhur kardioloqu Aydın Mustafa Ramazan ayında oruc tutan vətəndaşlara xəbərdarlıq edib.

Medicina.az  məlumatına görə, kardioloq deyib ki, oruc tutmaq insanların damarlarında elastikliyi artırır, insulin artmağa meyilli olur, ürək, qan-damar sistemində tromblaşmaya qarşı müsbət təsir edir. 

Amma bununla yanaşı bir sıra problemlərin meydana gəlməsi də mümkündür:

"Oruc tutan şəxslər imsaka mütləq oyanmalıdırlar. Onlar iftar zamanı az yeməli, ağır qidalar qəbul etməməlidirlər. İmsaka oyanmamaq artıq çəkinin yaranmasına səbəb ola bilər. Eyni zamanda, imsak və iftarda çox duzlu yemək qəbul etmək olmaz. Bu, ürək, qan-damar xəstəliklərinə səbəb ola bilər. Günboyu siqaret çəkməyib, iftardan sonra çox siqaret çəkməyin də ürəyə çox böyük ziyanı ola bilər. İftar ilə imsak arasında olan vaxtda kifayət qədər maye qəbul edilməlidir. İftar zamanı yeməkləri aramla və qısa məsafələr verməklə yemək lazımdır”.

O bildirib ki, imsakda sulu və lifli qidalara üstünlük vermək lazımdır. Belə qidalar insanı uzun müddət tox saxlayır. Kardioloq onu da əlavə edib ki, ürək, qan-damar xəstəliyi olan xəstələr həkimləri ilə məsləhətləşdikdən sonra oruc tuta bilərlər. Əks halda onların səhhətində problem yarana bilər.