Əhmədzadənin intim görüntülərlə şantaj olunan işçisi killer sifariş edib?-Video

Ötən il Elşən Cabbarov adlı sahibkarın Baş Mil-Muğan Kollektoru İstismarı İdarəsinin rəisi Bulat Ağabəyovu intim görüntüləri ilə şantaj edərək külli miqdarda pul tələb etməkdə ittiham olunması haqda xəbərlər yayıldı.

Bundan az əvvəl Cabbarovun iş ortağı Məhhəmməd Cəfərli həbs olunmuşdu.

Saytlar yazırdı ki, Elşən Cabbarov Bulat Ağabəyovun "hərəkətlərini" gizli kamera ilə lentə alaraq onu yayıb biabır etməmək müqabilində bir ilə yaxın müddətdə ondan hər ay 7 min manat pul almaqda şübhəli bilinib.

Eyni zamanda Elşən Cabbarov onu ifşa etməmək müqabilində Bulat Ağabəyovla 60 min manat, B. Ağabəyovun göstərişi ilə sürücüsü Azər Hüseynovla isə 50 min manat məbləğində borc müqaviləsini öz xeyrinə notarial qaydada təsdiq etdirib.

Bundan başqa, Elşən Cabbarov Salyan rayonu, Bəydili kənd sakini Vüqar Gülüşova qarşı da 220 min manata yaxın dələduzluq törətməkdə şübhəli bilinib.

Elşən Cabbarov Salyan rayonunda ən imkanlı ticarətçilərdən sayılıb.

İstintaq orqanı tərəfindən Elşən Cabbarovun barəsində Cinayət Məcəlləsinin 178-ci (dələduzluq), 182.2.2-ci (təkrar hədə-qorxu yolu ilə tələb etmə) və 182.2.4-cü (xeyli miqdarda əmlak əldə etmək məqsədi ilə hədə-qorxu yolu ilə tələb etmə) maddələri ilə ittiham elan edilib.

Korrupsiya.org bildirir ki, bu iş indiyədək davam edir. Və cinayət hadisəsinin yeni detalları üzə çıxıb.

Cinayət işində adı keçən şəxslərdən biri də Əsədov Təbriz Fərəc oğludur. Hazırda ona qarşı AR.CM-nin 296.2-ci maddəsi ilə ittiham irəli sürülüb.

Təbriz Əsədov deyir ki, ötən ilin bu vaxtı həmkəndlisi Vüqar Gülüşov onunla görüşüb. Elşən Cabbarov adlı sahibkarı aradan götürmək üçün 60 min manat vəd edib. Söhbət əsnasında bildirib ki, qətli Bulat Ağabəyov sifariş verir.

Təbriz sifarişi yerinə yetirəcəyinə söz versə də etmir, Üstəlik bu xəbəri öldürməli olduğu Elşən Cabbarova çatdırır.

Söhbət Bakıda "50 qəpik” çayxanasında olur. Elşən Cabbarov dərhal 102 xidmətinə məlumat verir. Onlar Xətai Rayon 37-ci Poliş Şöbəsinə aparılır. Təbriz orda izahatını verir.

Əsədov iddia edir ki, bir neçə gün sonra Xətai Polis İdarəsinin müstəntiqi Araz Məhərrəmov Salyana gəlib. Onu və Vüqar Gülüşovu "Şahdağ” restoranında görüşdürüb. Oda Gülüşov yalvarıb ki, ərizədə yazdıqlarının yalan olduğunu desin. Yoxsa onu tutacaqlar.

Bundan sonra Əsədov ifadəsini dəyişir, yalan dediyini yazır. Lakin Bakıda izahat yazıb rayona qayıtdıqdan sonra valideynləri onu danlayır.Deyirlər ki, düzünü yazmalı idin. Yenidən birinci izahatı ilə bağlı müxtəlif instansiyalara məktublar yazırlar.

Lakin deməyinə görə məktublara məhəl qoyulmur, onun birinci izahatı üzə çıxmır. Hazırda elə onu Cabbarovla və Cəfərli ilə qabaqcadan əlbir olan şəxs kimi ittaham irəli sürülüb.

Onun dediyinə görə Ağabəyovdan pillar alınanda, şantaj edilən epizodlarda olmayıb. Günahı yoxdur.

Cinayət işinin materiallarından görünür ki, bu işdə Bünyatova Elza Adil qızı və Qədirova Şüşəxanım Fəxrəddin qızına qarşı da AR.CM-nin 182.2.1 və 182.2.4 (hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatları yayma və ya onların əmlakını tələf etmə hədəsi ilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər) ittihamlar irəli sürülüb.

Əsədov deyir ki, Bulat Ağabəyov qızlarla iş yerində əyləncə təşkil edib. Sonra qızlar həmin intim görüntüləri Cabbarova ötürüblər. Şantaj olunan Ağabəyovdan pullar o vasitə ilə alınıb.

Maraqlidir ki, Salyanda Ağabəyovu Azərbaycan Respublikası Meliorasiya və Su Təsərrüfatı Açıq Səhmdar Cəmiyyətinin sədri Əhməd Əhmədzadənin kürvəsi , yaxın adamı kimi tanıyırlar. 20 ildən çoxdur vəzifə daşıyan bu şəxsin iş yerində belə görüntülərinin yayılması sadəcə biabırçılıqdır. Şantajçılara verilən pulların mənbəyi hardandır?

Məsələ ilə bağlı Bulat Ağabəyovun özü ilə danışdıq. O qısa olaraq bildirdi ki, kimin cinayət törədib-törətmədiyini istintaq və məhkəmə müəyyən edəcək.

Məsələni diqqətdə saxlayacağıq. korrupsiya.org