Sahibkarlar Zakir Fərəcovdan Operativ Qərargaha şikayət etdi

Sahibkarlar icra başçısından Operativ Qərargaha şikayət etdi

“Sizə əlacsızlıqdan müraciət edirik. Çünki 3 ildir halal zəhmətimizin haqqını ala bilmirik. İndiki şəraitdə sizə üz tutmağımız da halal haqqımızın alınaraq, bizə verilməsinə yadımçı olmağınızı istəməyimizdir”. JAMAZ.İNFO xəbər verir ki, bu sözlər 400-ə yaxın sahibkar və işçinin Azərbaycan Respublikası Nazirlər Kabineti yanında Operativ Qərargaha ünvanladığı müraciətdəndir.
Həmin müraciətdə deyilir ki, 2016-cı ildə Sumqayıt şəhərində Dənizkənarı Bulvarın inşa edilməsi, habelə şəhərin giriş hissəsinin abadlaşdırılmasını həyata keçirən sahibkar və zəhmət adamları icra başçısı Zakir Fərəcovdan pullarını ala bilmirlər. “Biz Sumqayıtın yeni sima almasını həyata keçirən insanlarıq. İnşa etdiyimiz Dənizkənarı Bulvar və şəhərin giriş hissəsinin yenidən qurulmasını həyata keçirməyimizə baxmayaraq, bunun üçün ayrılmış pulumuzu hələ də ala bilməmişik. Dəfələrlə Sumqayıtın icra başçısının qəbulunda olmağımıza baxmayaraq, onun müxtəlif bəhanələr gətirməsi, habelə bizi təhdid etməsi dövlətin həyata keçirdiyi siyasətin ziddinədir, Cənab Prezident İlham Əliyevin iradəsinin əleyhinə getməkdir. Ona görə ki, dövlət başçısı bütün çıxışlarında sahibkarlara, zəhmət adamlarına dəstək olmağı tələb etsə də, Zakir Fərəcov bunun əleyhinə gedir”.
İş adamları qeyd edirlər ki, görülən işlərin məbləği böyük olsa da, indiyə qədər onu ala bilməyiblər. Onların sözlərin görə, Zakir Fərəcov hər vəchlə onlara çatacaq 8 milyon manat pulu verməkdən imtina edir. “Fərəcov bizi qəbul etdikdə əvvəlcə borclu olmadığını, daha sonra ona pul ayrılmadığını iddia etdi. Daha sonra isə pulun 30 faizinin ona verilməsi müqabilnidə yerdə qalanını qayatara biləcəyini söylədi. Belə bir təklifi dilə gətirmək icra başçısı üçün utanc olmalıdır. Lakin biz bunu rədd etdiyimizdən, hədələməyə, həbs etdirəcəyini bildirdi. Elə bu təhdid və hədələr səbəbindəndir ki, xeyli müddətdir Sumqayıt şəhərinə belə gedə bilmirik”.
Sahibkarlar vurğulayırlar ki, tikinti işlərinin aparılması üçün dövlət tərəfindən vəsait ayrılsa da, Zakir Fərəcov onu şəxsi məqsədləri üçün xərcləyib. Onlar qeyd ediblər ki, əgər belə olmasaydı, Sumqayıtın icra başçısı onlara çatacaq pulları çoxdan vermiş olardı. “Zakir Fərəcov dövlətin ayırdığı vəsaitləri öz şəxsi malı kimi xərcləyir. İstədiyinə pul verir, istədiyinə vermir. Bizim müraciətlərimizə əhəmiyyət belə vermir. Bu azmış kimi, bizi hədələməkdən də çəkinmir. Sumqayıtın icra başçısının bu qədər özbaşınalıq etməsi, qanunsuzluğa imza atması yolverilməzdir və bunun qarşısı alınmalıdır”.
Onların bildirdiyinə görə, hal hazırda tikintidə istifadə olunan inşaat materiallarının pulunu belə ödəyə bilməyiblər. “Düz, üç ildir belə vəziyyətdəyik. Halal pulumuzu ala bilmədiyimizdən, ayrı-ayrı insanlara borclu qalmışıq. Hər yerə müraciət etmişik, lakin indiyə qədər problem həllini tapmayıb. Ona görə də, indiki ağır şəraitdə olsa belə, sizə müraciət etmək qərarına gəldik”.
“Biz bilirik ki, bu gün təkcə Azərbaycan deyil, bütün dünya üçün ağır bir dövrdür” deyə müraciətdə qeyd edən sahibkarlar əmin olduqlarını bildiriblər ki, yaxın zamanlarda problem aradan qaldırılacaq. “Biz əminik ki, dövlət başçımızın gərgin əməyi sayəsində bu dövrü adlayacağıq. Buna heç kim şübhə etmir. Həyata keçirilən işlərdən və hazırlanan layihələrdən də aydın görünür ki, ölkə rəhbəri xalqın, sahibkarların, zəhmət adamlarının yanındadır, onların çətinlik çəkməməsi üçün əlindən gələni edir”.
Müraciətin sonunda isə deyilir ki, onların məqsədi problemlərinin həll olunmasına nail olmaqdır. “Sizdən xahişimiz odur ki, biz bir qrup sahibkarın halal zəhmətinin haqqının Sumqayıtın icra başçısı Zakir Fərəcovdan alınaraq, verilməsini təmin etməyə yardımçı olasınız. Bunun üçün səlahiyyətinizdən istifadə etməyinizi, məsələ ilə bağlı göstəriş verməyinizi xahiş edirik. Xahiş edirik ki, təkcə biz sahibkarların deyil, həmin tikinti işlərində çalışmış əli qabarlı insanların zəhmətinin haqqının ödənilməsinə köməklik göstərəsiniz”.