Mən nazir Sahil Babayevi tərifləmirdim

Hətta ciddi insanlar belə yeni kadrlara qarşı inamsızdırlar

Səbəb…

Sosial şəbəkədə Əmək və Əhalinin Sosial Müdafiəsi naziri Sahil Babayev haqqında müsbət xarakterli bir status yazdım. Əslində bu status son illər təyin edilən bütün gənc nazirlərin fəailiyyətinə ümumiləşdirilmiş bir baxış idi. Sadəcə son günlər yardım məsələsinə görə ictimai hədəfə çevrilən nazir Sahil Babayevi müsbət mənada dəyərləndirdim. Fikrimcə obyektiv qiymətləndirmə apardım.

Status təqribən bu cürdür. (Təbii ki, statusa bəzi düzəlişlər etmişəm.)

 Telejurnalist Şöhrət Əli.

Son 2 ay ərzində, yəni Koronovirus pandemiyası ortaya çıxandan Əmək və Əhalinin Sosial Müdafiəsi Nazirliyinin gördüyü işlər sosial şəbəkələrdə ciddi müzakirə edilir. Əksər müzakirələrdə bu nazirlik yarıtmaz bir obrazda təqdim olunur. Və görülən işləri dibindən baltalamaq kimi mövqe sərgilənir. Bəzilər hətta Sahil Babayevin istefasını tələb edir. Mənim fikrimcə bu düzgün yanaşma deyil. Təbii ki, nazirliklə bağlı ciddi narazalıqlar var və gələcəkdə də olacaq. Çünki bu dönəmdə görülən işlərin miqyası çox genişdir. İnsanların sayı milyonlarladır. Ortada texniki və insan faktoru var. İstər-istəməz problemlər yaranır. Təbii ki, biz bu problemləri, nöqsanları görüb deməliyik ki, düzəltsinlər. Ümidverici hal odur ki, kütləvi yeyintilər, mənimsəmələr yoxdur. Nazir Sahil Babayev gəncdir, Avropa təhsili görüb, işləməyə həvəslidir, özündən əvvəlkilərə rəhmət oxutdurmadı, onlar kimi acgözünə yeyib dağıtmır. Ona tapşırılan işi düzgün əməl etməyə, büdcədən ayrılan pulları düzgün paylamağa cəhd edir.Yeyintiyə yol verməməyə çalışır. Təqribən redaktə edib yazı formasına saldığım bu statusa, mətbuatda və cəmiyyətdə kifayət qədər mövqeyi olan şəxslər tərəfindən maraqlı, ən əsası isə qərəzsiz fikir bildirdilər.

Telejurnalist Asəf Quliyev

Nikbinlik niyə yoxdur deyim.

1. Əhalinin sosial durumunun xəritəsi yoxdur. Çünki əhalinin 90 faizinin gəliri barədə məlumat bəlli deyil. Nazirdən tutmuş fəhləyə qədər.
2. Nazir və müavinləri sosial ehtiyacın nə demək olduğunu anlayan biri deyillər.
3. Sosial yardım mexanizmini sadələşdirmək  əvəzinə mürəkkəbləşdirirlər. Mürəkkəblik isə dolaşıqlıq yaradır.
4. Əhalinin sosial yardıma ehtiyacı olan təbəqəsi müasir texnologiyalarla tənzimlənən sistemdən yararlanmaq imkanından məhrumdur.

TimeSoft şirkətinin direktoru, İT mütəxəssisi. Elvin Abbasov.

Dünyada o cümlədən ölkədə yaranan fövqəladə hal heç də əvvəldən planlaşdırmamışdı. Mediadan gördüyümüz kimi dünyanın ən inkişaf etmiş ölkələri, o cümlədən Avropa ölkələri bu vəziyyətdə çox aşağı göstəricilər nümayiş etdirdilər. Və bu sınaq onlar üçün çətin keçdi. Azərbaycan Avropa ölkələrinə baxanda bu sınaqdan daha yüksək göstəricilərlə çıxdı. O ki, qaldı Əmək və Əhalinin Sosial Müdafiəsi Nazirliyinə. Təbii ki, bu qurum fövqəladə vəziyyətdə ön planda xidmət etməli oldu. Misal üçün 190 manat yardım məsələsi ən çox tənqid olunan mövzudur. Əksəriyyət elə düşünür ki, orda kimsə oturub deyir ki, yardımı filan kəsə verək, filan kəsə yox. Halbuki, proses bu tip vəziyyətlərdə proqram təminatı tərəfindən qoyulan şərtlər və digər aidiyyatı qurumlardan gələn servis məlumatları əsasında, insan faktoru olmadan həyata keçir. Məncə tənqid etmək, qınaq obyektinə çevirmək asandır nəyin ki, təklif və ya təşəkkür etmək. Məncə pandemiya ərəfəsində Əmək və Əhalinin Sosial Müdafiəsi Nazirliyi çox yüksək göstəricilərlə iştirak etdi.

Ehtiyatda olan zabit, politoloq Üzeyir Cəfərov.

Üzeyir Cəfərovun bir sözi tənqid formatından çıxdığına görə yazıdan çıxartdım.

Dəyərli Şöhrət bəy, 21-ci əsrdə, kömpüter əsrində belə işləyən nazir və nazirlik kimə lazımdır? Sahil Babayev kimi qorxaq nazir hələ o sistemdə olmayıb. O günü Biləsuvarda həbs olunan əməkdaşından dərhal imtina etdi ki,  sən demə bir neçə gün bundan əvvəl işində yol verdiyi nöqsanlara görə işdən çıxarılıb?!

 Fazil Talıbova yazığım gəlir. (Nazirliyin mətbuat xidmətinin rəhbərini nəzərdə tutur) Ara yerdə bu cavan oğlan olan-qalan hörmətdən də düşdü. Sahil Babayev çox uğursuz kadrdır. Baxmayaraq ki, prezident onu bir balaca təriflədi. Zamanında baxarsız. Ən çox narazılıq yaradan adam və qurumdur bu nazirlik.

 Telejurnalist Şöhrət Əli

Məncə zamanı gözləmək lazım. Gənc kadrdı. İş prinsipi əvvəlki canavarlardan fərqlənir. Nəsə etməyə cəhd edir. Nəticələri də azdan-çoxdan var. Biz bu tezliklə, birdən-birə niyə onu kəsib atmaq istiyirik. Hal-hazırda mənimdə bu qurumdan ciddi narazılığım var. Amma mən bu miqyasda bir işin altına girib, heç də uğursuz olmayan işlər görən kəsi baltalamağın tərəfdarı deyiləm. Har halda Sahil Babayevdən əvvəl “işləyən” nazirləri mən də yaxşı tanımışam.

Terapevt-androloq Hidayat Mustafayev

Bilirsənki fikirlərinə hormətlə yanaşıram. Burda sənlə razı deyiləm. Çunki dövlət strukturları normal isləmir. İnformasiya prezidentə düzgün çatdırılmır. Bu vəziyyətdə yeganə isləyən prezident oldu. Heç bir nazirdən təşəbbüs gəlmədi.

RF Dağıstan Respublikasının Azərbaycanda nümayəndəliyi Xosrov Həsənbəyov

Bu günkü durumda, respublikanın ən çətin vaxtlarında hesab edirəm ki, nazir Sahil Babayev kifayət qədər professional və şəffaf iş göstərdi. Və inanıram ki, o öz vəzifəsinə tam məsuliyyətli və professional yanaşaraq çox uğurlara nail olacaq.

Telejurnalist Şöhrət Əli

Gördüyünüz kimi mənim nazir Sahil Babayevlə əlaqədar sosial şəbəkədəki fikirlərim heç də cəmiyyətin nüfuzlu və peşəkarı olduğu sahələrin nümayəndələri tərəfindən bir mənalı qarşılanmadı. Hər halda Əmək və Əhalinin Sosial Müdafiəsi Nazirliyinin rəhbərliyi cəmiyyətin ziyalı təbəqəsinin, peşəkar iş qabiliyyəti olan mütəxəssislərinin fikirlərini dinləyib nəticə çıxartması daha düzgün olardı.

 Şöhrət Əli