“Qarabağın işğalına kar, kor və lal qalanların bugünkü davranışı ikiüzlülükdür”

“Burada bir daha Azərbaycandakı qardaşlarımızın işğal altındakı torpaqlarını azad etmək və vətənlərini qorumaq uğrunda apardıqları mübarizədə yanlarında olduğumuzu bildirirəm”.

“Qafqazinfo” xəbər verir ki, bu sözləri Türkiyə Prezidenti Rəcəb Tayyib Ərdoğan bu gün Türkiyə Böyük Millət Məclisində çıxışı zamanı deyib.

Bununla yanaşı Ərdoğan münaqişənin həllində vasitəçi kimi iştirak edən ölkələri problemə biganə yanaşmaqda təqsirləndirib:

“Xüsusilə Minsk Qrupu adlandırılan ABŞ, Rusiya və Fransanın 30 ilə yaxındır bu problemə biganə yanaşdıqları üçün baş verən bu negativ hadisələr qarşısında atəşkəsə çağırmaları qəbuledilməzdir. Əgər bir şey istəyirlərsə, işğalçıların burdan çıxmaları lazımdır ki, bir həllə nail olunsun.

Azəri qardaşlarımız hazırda torpaqlarına qayıdacaqları günü gözləyirlər, onun həsrəti içindədirlər, buna heç kim fikir vermir. Bunları biz Putinlə müzakirə etdik, Makronla da müzakirə etdik. Həmişə oturdular, danışdılar, ancaq nəticə olmadı. İndi isə nəticə zamanıdır. Və azərbaycanlı qardaşlarımız da öz işlərini özləri həll etmək üçün addımlarını atdılar. Ermənilərin qədim Azərbaycan torpağı Qarabağın işğalına və törətdikləri mülki qətliamlara qarşı, lal, kar və kor qalanların bu gün göstərdikləri mövqe ikiüzlülükdür”.