Tanınmış jurnalist Nazlı Ağayeva üçün I Vitse-prezidentə müraciət

"Azərbaycan Respublikasının Birinci vitse-prezidenti Mehriban xanım Əliyevaya

Ədəbiyyata, yaradıcı insanlara xüsusi diqqətinizi, onların problemlərinə hər zaman dəstək olduğunuzu nəzərə alaraq, bu müraciəti Sizə ünvanlayırıq. 

Yazıçı-publisist Nazlı Ağayeva ağır mənzil şəraitində yaşayır. 30 ildən artıqdır Azərbaycan mətbuatında və ədəbiyyatında imzası ilə seçilən, paytaxtdan kənarda yaşamasına baxmayaraq, bütün ədəbi proseslərin mərkəzində olan Nazlı xanım 1910-cu ildə inşa edilmiş və real qəza vəziyyətində olan bir kommunal mənzildə yaşayır. Ağır sosial durumda olan 60 yaşlı yazar xanım səhhətindəki ciddi problemlərlə, üstəlik həyati təhlükələrlə dolu ağır şəraitdə əzab-əziyyət çəkir. Onun bu durumu qələm yoldaşlarını ciddi narahat edir və bu səbəbdən Sizə müraciət edirik.

Ədəbiyyat və mətbuatımızda xanım yazar olaraq xidmətlərini nəzərə almaqla publisist Nazlı Ağayevanın problemlərinə diqqət göstərərək bu taleyüklü məsələyə biganə qalmayacağınıza inanırıq. Göstərəcəyiniz dəstəyə görə ədəbiyyat və ümumən ictimaiyyət nümayəndələri adından Sizə öncədən öz minnətdarlığımızı bildiririk”.

 

Nazlı Ağayeva 1960-cı ildə o vaxtkı Qutqaşenin Məmmədağalı kəndində doğulub. Erkən yaşlarından müxtəlif səpkili yazılar yazıb. Kolxozun kənd təsərrüfatı işlərindən tutmuş məktəbdə texniki işçiyə qədər çalışandan sonra nəhayət ixtisası üzrə kənd kitabxanasının müdiri olub. Orada dörd işlədikdən sonra işdən könüllü imtina edib yerli "Qalibiyyət" qəzetinə gəlib. Özünün təkidli xahişlərinə əsasən redaksiyada yeganə boş ştat olan xadimə işinə götürülüb. Qışda isə redaksiyanın oçaqçı ştatını icra edib. Eyni zamanda qəzetin müqavilə üzrə müxbiri kimi fəaliyyət göstərib. Əmək kitabçasındakı rəsmi xadimə və ocaqçı ştatlarına rəğmən, redaktor doxsanıncı illərdə Qazaxıstana gedən araşdırmaçı komissiyaya redaksiyadan nümayəndə olaraq onu göndərib.

Bir neçə il orada çalışdıqdan sonra dövrü mətbuatın bəzi nüfuzlu qəzetlərinə zona üzrə müxbir dəvət olunub.

 

Birinci Qarabağ savaşı başa çatana kimi ən qaynar nöqtələrdən yazılar hazırlayıb. Cəbhə müxbiri işini yerinə yetirib.

 

1996-cı ildə Azərnəşr tərəfindən dərc olunmuş "Qədir" adlı kiçik bir kitab vəyüzlərlə müxtəlif janrlı yazılar müəllifidir.