Məşhur sabiq rektorlar indi haradadır ?

Moderator.az bir zamanlar ali təhsil müəssisələrində rektor vəzifəsində çalışmış məşhur elm adamlarının hazırki fəaliyyətləri ilə bağlı yazını təqdim edir:

Bakı Dövlət Universitetinin sabiq rektoru akademik Abel Məhərrəmov 2018-ci ilin noyabrında vəzifəsi ilə vidalaşsa da, bu gün də ona doğma olan universitetlə əlaqəsini kəsməyib.

O, hazırda BDU-nun Kimya fakültəsinin Üzvi  kimya kafedrasının müdiridir.

Qeyd edək ki, A.Məhərrəmov 1999-2018-ci illərdə BDU-nun rektoru vəzifəsində çalışıb. O, həmçinin, Milli Məclisin III (2005-2010) və IV çağırış (2010-2015) deputatı da olub.

 Azərbaycan Dövlət Bədən Tərbiyəsi və İdman Akademiyasının sabiq rektoru Ağacan Əbiyev uzun müddət bu vəzifədə çalışıb. O, 28 il (1987-2015) adıçəkilən ali təhsil müəssisəsinə rəhbərlik edib. Azərbaycanda idmanın inkişafında rolu olan şəxslərdən biridir. 86 yaşı olmasına baxmayaraq, bu gün də idman sahəsindən tam uzaqlaşmayıb. Hazırda Azərbaycan Boks Federasiyasının vitse-prezidentidir.

 Professor A.Əbiyev parlamentin də 3 çağırış deputatı kimi fəaliyyət göstərib.

 Azərbaycan Dövlət Aqrar Universitetinin sabiq rektoru, professor İbrahim Cəfərov ötən ilə qədər bu vəzifədə çalışıb. Onun rektorluq fəaliyyəti 2013-2022-ci illəri əhatə edir. Kənd təsərrüfatı elmləri doktoru, professordur. AMEA-nın müxbir üzvüdür. Bu gün də peşə fəaliyyətini öz ixtisası istiqamətində davam etdirir. Hazırda Kənd Təsərrüfatı Nazirliyinin nəznindəki Bitki Mühafizə və Texniki Bitkilər Elmi-Tədqiqat İnstitutunun direktorudur. 3 dərslik, 1 dərs vəsaiti, 2 patentin müəllifidir.

 Bakı Slavyan Universitetinin sabiq rektoru, professor Nurlana Əliyeva 5 il adıçəkilən ali təhsil müəssisəsinə rəhbərlik edib. 2016-cı ildə işə başlayan N.Əliyeva 2021-ci ildə ölkə başçısının sərəncamı ilə vəzifəsindən azad edilib. Filologiya elmləri doktoru olan N.Əliyeva həm də Yeni Azərbaycan Partiyası Qadınlar Şurasının sabiq sədridir.

 Hazırda elmi fəaliyyətini davam etdirir. BDU-nun professoru, AMEA Nizami adına Ədəbiyyat İnstitutunda doktorluq üzrə ixtisaslaşmış dissertasiya şurasının üzvüdür.

 Azərbaycan Dövlət İqtisad Universitetinin sabiq rektoru Şəmsəddin Hacıyev 10 il bu nüfuzlu ali təhsil müəssisəsinə rəhbərlik edib. 2004-cü ildə rektor vəzifəsinə keçən Ş.Hacıyev 2014-cü ildə ölkə başçısının sərəncamı ilə vəzifəsindən uzaqlaşdırılıb. Hazırda elmi fəaliyyətini yenə də həmin universitetdə davam etdirir. UNEC-in Beynəlxalq İqtisadi Münasibətlər kafedrasının müdiridir.

 Azərbaycan Tibb Universitetinin sabiq rektoru akademik Əhliman Əmiraslanov və Azərbaycan Dillər Universitetinin sabiq rektoru professor Səməd Seyidov hazırda parlamentdə komitə sədri kimi çalışırlar. Akademik Ə.Əmiraslanov Səhiyyə, S.Seyidov isə Beynəlxalq münasibətlər və parlamentlərarası əlaqələr komitəsinin sədridir.

 Azərbaycan İlahiyyat İnstitutunun sabiq rektoru Ceyhun Məmmədov hazırda Milli Məclisin deputatı, Elm və təhsil komitəsinin üzvüdür. (ardı var)