Rüşvətə görə məhkum edilmişdi, məktəb direktoru təyin olundu

“Qafqazinfo”nun əldə etdiyi məlumata görə, ötən il Cinayət Məcəlləsinin 32.4, 312.2-ci (rüşvət vermədə iştirak) və 178-ci (dələduzluq) maddələri ilə təqsirli bilinən və Bakı Ağır Cinayətlər Məhkəməsinin hökmü ilə 1 il müddətə dövlət və yerli özünüidarəetmə orqanlarında rəhbər və maddi-məsul vəzifə tutma hüququndan məhrum edilməklə 1 il şərti cəzaya məhkum edilən Y.Məhərrəmov təhsil nazirinin əmri ilə Tərtər rayon Evoğlu kənd tam orta məktəbinə yeni direktor təyin edilib. O bu gün orta məktəbdə keçirilən tədbirlə birgə direktor kimi vəzifəsinin icrasına başlayıb.

Bildirilib ki, Y.Məhərrəmov bu məktəbdə 2006-2011-ci illərdə də direktor vəzifəsində çalışıb. O, müxtəlif vaxtlarda rayonun Yuxarı Sarıcalı kənd tam orta məktəbinin direktoru, rayon Təhsil Şöbəsinin müdiri vəzifələrini də tutub.

Yaşar Məhərrəmov açıqlamasında barəsində məhkəmənin çıxardığı hökmün tələbinin artıq ödənildiyini bildirib. O, Təhsil Haqqında Qanunun 36-cı maddəsinə əsasən müəyyən edilmiş hallarda cəzası ödənilmiş şəxsin sonradan pedoqoji fəaliyyətə davam etməsinin mümkün olduğunu əlavə edib.