VƏTƏN SEVGİSİNİ MÜƏLLİM ÖYRƏDİR

...Xatirəmdə ən çox iz buraxan illərim orta məktəbdə oxuduğum çağlarım olub. Nədən ki, bu tədris ocağı sözün həqiqi mənasında bir Akademiya idi.

Ümumtəhsil məktəblərində nələr tədris olunmur ki?

Elə bir fənn yoxdur ki,ondan hali olmayasan.Təbiət elmlərinin vurğunu olsam da, ədəbiyyat fənninə olan marağım da az deyildi.Bütün bunlarla yanaşı müstəsna olaraq "Gənclərin çağrışaqədərki hərbi hazırlığı" fənninə olan həvəsim,istəyim tamamilə fərqli idi.Şagirdə fənni sevdirən elə onu tədris edən müəllimdən başlayır.Bizim Hərbi hazırlıq müəllimiz həm cavan,həm də enerjili idi.Rəhimov Füzuli Ərşad oğlu.Ali məktəbi yenicə qurtarıb təhsil aldığım Zəngilan şəhər 2 saylı tam orta məktəbinə təyinat almışdı.Elə ilk gündən bizə hərbin sirlərinə necə yiyələnməyi, Vətənpərvərlik ruhunda böyüyüb boy atmağı ilhamla,böyük coşqu ilə öyrədirdi.Füzuli müəllim təməlindən bizə ulu babamız olan Şah İsmayıl Xətainin vahid dövlət formasında birləşməsindən,Azərbaycan torpaqlarının geri qaytarılmasından əsaslı və hüquqi faktlarla izah edir,onu bir vəzifə olaraq bizim qarşımıza məqsəd kimi qoyurdu.Onu da deyim ki, məktəbimizdə bu fənnin əyani surətdə tədrisi üçün hər cür imkan və şərait mövcud idi.Əyani vəsaitlərdən səmərəli istifadə etmək,ondan kifayət qədər yararlanmaq bizdə olan marağı daha da artırırdı.Hərbi hazırlıq kabinetində avtomatı söküb-yığmaq, tez-tez tirə üz tutub... sərrast atəş açmağın yollarını,qaydasını öyrənməkdən qətiyyən doymazdıq.Hərbi xidmətdən yenicə qayıdan əsgərlərimizin formasını alıb onun dərsində geyməkdən fəxr və fəxarət hissi duyardıq.Füzuli müəllimin özü belə hərbi paltar geyinməyimizə məmnuniyyətlə icazə vermişdi.Bu,bir Vətən sevgisinin işartıları idi.Füzuli müəllim tez-tez bizim məktəblilər arasında keçirilən "Şahin"və  "Qartal" hərbi-idman oyunlarında iştirakımızı yüksək səviyyədə təmin edirdi.Bu oyunlarda qalib olmağımıza  hədsiz sevinir, qürurlanırdı...Bütün bunlar bizim praktik təcrübəmizin zənginləşməsinə,möhkəmlənməsinə böyük stimul verirdi.Digər tərəfdən Füzuli müəllim bizə nəzəri bilikləri də həvəslə öyrədir,qəhrəmanlıq və igidlik göstərən oğul və qızlarımızın müharibə illərində göstərdiyi şücaətindən maraqlı epizodlar danışardı.Hərbi müəllimimiz... Həzi Aslanovun,Mehdi Hüseynzadənin,Qafur Məmmədovun,cəsur təyyarəçi,təcrübəli tarançı Hüseynbala Əliyevin döyüş yollarından,göstərdikləri qəhrəmanlıqlardan maraqlı,heyrət doğuran epizodlar,əhvalatlar danışardı.Sanki kino kadrları keçirdi gözlərimizin önündən..."Göylər qızı" kimi tanınan,pilot qadınımız Züleyxa Seyidməmmədovanın qorxmazlığından,fədakarlığından dəyərli sitatlar gətirər,bizi bir fərd...Vətəni,torpağı sevən bir şəxs kimi formalaşmağımızda bilik və bacarığını əsla əsirgəmirdi.İkinci dünya müharibəsində digər qəhrəman qadınlarımızın keçdiyi döyüş yolundan ətraflı məlumat verir,bizə həqiqətən ayrılıqda bir Vətən sevgisi,Vətən məhəbbəti öyrədirdi.Füzuli müəllim ilk Azərbaycanlı qadın snayperçi Ziba Qəniyevdən ağızdolusu danışar,sanki onun qəhrəmanlığını bizim ruhumuza köçürürdü.Tibbi xidmət sahəsində Azərbaycan qadınlarının dəyanətindən,bir şəfqət bacıları kimi onların gərgin və əvəzsiz əməyindən geniş məlumatlar verir,dəlillər,sübutlar gətirirdi.Dəniz üzərində gedən döyüşlərdə əsl şücaət,rəşadət göstərən Şövkət Səlimovadan olan söhbətləri isə bizdə qeyri-adi heyrət doğururdu.Bu qəhrəman qadının "Dnepr" adlı döyüş gəmisi ilə cəbhə xəttindən çıxarılan yaralıları Bakıya hospitallara daşınması da və həyatlarının xilası da məhz Şövkət Səlimovanın adı ilə sıx bağlıdır.Qadınlarımızın igidliyindən,qəhrəmanlığından Füzuli müəllimin belə ətraflı və sübutlarla danışması bizə də sirayət edir,qanımızı hər an coşdururdu!Təlim-tədris zamanı elə atmosfer yaratmışdı ki, şagird-müəllim qarşılıqlı münasibətləri doğmalaşmışdı.Sanki biz Füzuli müəllimi kəşf etmişdik.Onunla nəinki bir pedaqoq kimi...bizə göstərdiyi mehribançılıq və səmimiyyət mənəvi dostluğa çevrilmişdi.Sanki bizim ən yaxınımız,ürək sirdaşımız idi...Füzuli müəllim!Hamı onun xətrini çox istəyirdi...eləcə dərs dediyi şagirdlərini də özü...Həmişə Füzuli müəllim haqqında düşünəndə qədim Yunan filosofu Aristotelin bu hikmətli kəlamı yadıma düşür:"Atam məni Göydən Yerə endirmişsə,müəllimim isə Yerdən Göyə qaldırmışdır"...O,əsl pedaqoq idi.Bir gün Füzuli müəllimi görməsək,darıxardıq.Qəlbimizə hakim kəsilmişdi!1993-cü ilin qarışıq və çətin günlərində Füzuli müəllim pedaqoji kollektivdən ayrılıb,Daxili İşlər Orqanlarında fəaliyyətini davam etdirdi.Belə xarakterdə,belə təbiətdə olan bir adam sakit dayana bilməzdi.Düşmənə öz sözünü deməli,gücünü göstərməli idi.Ermənilər Zəngilanın sərhəd kəndlərinə tez-tez basqın edir,dinc əhaliyə rahatlıq vermirdi.Belə bir çətin və ağır vaxtlarda Vətən öz qeyrətli oğullarını düşmənə sipər olmağa çağırırdı.Füzuli müəllim kimi!Rayonumuzun Qazançı,Dərəli,Ağkənd,Yuxarı Gəyəli,Günqışlaq,Pirveyis,Canbar,Seyidlər,Bürünlü,Şayıflı,Nəcəflər,Yusiflər,Qaragöl və neçə-neçə belə sərhəd kəndlərinin mühafizə olunmasında,qorunmasında igidlik,şücaətlər göstərmişdi,Füzuli müəllim...Qusursuz xidmətinə görə Füzuli Rəhimov 1,2,3-cü dərəcəli medallara,"Polis əlaçısı" döş nişanına layiq görülmüşdür.Ustalıq dərəcəsi döş nişanına və "İgidliyə görə" medalı ilə təltif olunması onun döyüşlırdə qazandığı uğurların nəticəsidir.Çoxlu sayda Fəxri Fərmanlar,pul mükafatları onun Vətən qarşısında əldə etdiyi etimad,inam idi!F.Rəhimov orta məktəbin hərbi hazırlıq müəllimliyindən 22 il müddətində böyük döyüş yolu,səngər həyatı keçərək...polis kapitanı rütbəsinə qədər yüksəlmişdir!Bax,mənim sevimli müəllimim belə olmuşdur.Biz ondan öyrəndik cəsarəti,hünəri, qəhrəmanlığı.Biz ondan öyrəndik...Vətəni sevməyi,əsl insanlığı!Heç vaxt unutmadığımız Füzuli müəllimdən!
Səbirə Ələkbərova,Kənd Təsərrüfatı Nazirliyi yanında Aqrar Xidmətlər Agentliyinin Zəngilan rayon şöbəsinin əməkdaşı.