Bunu "Report”a açıqlamasında bir mənbədən satınalmaları şərh edən İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli bildirib.

O, qeyd edib ki, bir mənbədən satınalmanı mənfi hal kimi qiymətləndirmək düz deyil:

"Bu gün mövcud qanunda dövlət satınalmaları istiqamətində bütün proseslərə Dövlət Xidmətinin nəzarət etməsi öz əksini tapıb. Yəni, bir mənbədən satınalma Dövlət Xidmətinin razılığı ilə olan prosesdir. Yeni qanunda da ona oxşar yanaşmalar olacaq.

Bir mənbə deyəndə çox vaxt fikirləşirlər ki, bu səhv bir metodikadır. Əgər bir mənbədən satınalma prosesi səhv olsaydı, qanunda ona imkan, icazə verilməzdi. Digər satınalma metodları kimi bir mənbədən satınalmanın da əsasları var. Qanuna baxsanız görərsiniz ki, orada bunun üçün dörd meyar göstərilib. O meyarlardan biri odur ki, Nəzarət Dövlət Xidməti bir mənbədən satışa nəzarəti həyata keçirir. Misal üçün, əgər siz bir kinorejissorsunuzsa və yaxud rəssamsınızsa, hansısa dövlət qurumu bir əsər almaq istəyirsə, təbii olaraq bu halda tender keçirilə bilməz. Bu, insanın əqli mülkiyyəti əsasında olan məhsuldur. Ona görə burada bir mənbədən satınalma metodu tətbiq edilməlidir. Yəni təklif edirəm ki, bir mənbədən satınalmaya 100% mənfi hal kimi yox, satınalma metodlarından biri kimi baxılsın”, - deyə M.Abbasbəyli əlavə edib.

"Dövlət qurumları növbəti il üçün dövlət büdcəsi təsdiqlənən zaman özlərinin illik satınalma planlarını hazırlayırlar və həmin plana uyğun olaraq büdcədən onlara vəsait ayrılır. Dövlət Xidməti həmin vəsaitdən düzgün istifadəyə nəzarət edir. Yəni bizim məqsədimiz təkcə satınalmaların səmərəli və şəffaf keçirilməsi yox, eyni zamanda satınalmalar vasitəsi ilə sahibkarların rəqabət qabiliyyətinin artırılmasıdır. Yəni biz hər bir dövlət qurumunun satınalma büdcəsinin düzgün, şəffaf, səmərəli və məqsədyönlü istifadə edilməsini təmin edə biliriksə, bu o deməkdir ki, sonda bizim sahibkarlığımızın inkişafı dayanıb”, - deyə M.Abbasbəyli fikrini tamamlayıb.