Terrorda ölənlərin sayı artdı - Yenilənib

“Crocus City Hall”da törədilən terror aktında yaralananların sayı 154-ə çatıb.

“Qafqazinfo” xəbər verir ki, bu barədə Rusiya Fövqəladə Hallar Nazirliyi məlumat yayıb.

Bildirilib ki, son məlumata görə, ölənlərin sayı 3-ü uşaq olmaqla 133 nəfər, yaralananların sayı isə 154 nəfərə yüksəlib.

Belə ki, üç zərərçəkmiş artıq Moskva yaxınlığındakı xəstəxanalardan evə buraxılıb. 107 nəfərin stasionar, 44 nəfərin isə ambulator müalicədə olduğu qeyd edilir.

***

Rusiya Federasiyasının İstintaq Komitəsinin məlumatına görə, ölənlərin sayı 137 nəfərə yüksəlib.

 “Cinayət yerinə baxış davam edir. Bu günə kimi 62 cəsədin şəxsiyyəti müəyyən edilib. Qalan qurbanların şəxsiyyətlərinin müəyyən edilməsi üçün genetik ekspertiza aparılır”, - İstintaq Komitəsi açıqlayıb.

***

Moskva vilayətinin Səhiyyə Nazirliyi martın 22-də “Crocus City Hall” konsert zalında baş vermiş terror aktı nəticəsində  xəstəxanaya yerləşdirilən yaralıların siyahısını yeniləyib.

Bildirilib ki, ümumilikdə 180 ad var.

Belə ki, 142 nəfər stasionar, daha 38 nəfər isə ambulator müalicə alır.