Qaynarinfo-nun məlumatına görə, 1976-cı ildə Ağdam rayonunda anadan olmuş Səbuhi Hüseynovun (soyad şərti) Moskva Univermağının birinci mərtəbəsində yerləşən "ST Jewellery" adlı qızıl-zinət əşyalarının satışı məntəqəsi var. Səbuhi və univermağın ikinci mərtəbəsində yerləşən "Diamond" adlı ofisin sahibi, 15 avqust 1988-ci il təvəllüdlü Orxan Əliyev (soyad şərti) birlikdə orada hazırlanan qızıl əşyalarını Türkiyə və İtaliyada istehsal edilmiş original zərgərlik məmulatı adı ilə satıblar. 

Hər iki sahibkar əvvəlcədən razılaşaraq "Diamond"in ofisində sexdə hazırlanan qızıl məmulatlarının yerli sexdə hazırlandığını deməyib və müştərilərə baha və original zərgərlik məmulatı adı ilə təqdim ediblər. Müştərilərdən biri bunu bilib və hüquq-mühafizə orqanlarına müraciət edib. 

Hər iki sahibkar 1 ay 21 gün müddətində həbsdə saxlanıldıqları, zərərçəkmişə dəyən zərəri ödədikləri üçün Cinayət Məcəlləsinin 200.2.2-ci maddəsi ilə təqsirli biliniblər və 2000 manat miqdarda cərimə olunublar. Hər iki sahibkar barəsində başqa yerə getməmək barədə iltizam qətimkan tədbiri hökm qanuni qüvvəyə minənədək dəyişdirilmədən saxlanılıb.