Sabiq müdafiə naziri: - Hərbi çağırış həddini nəinki 30 yaşa, 27 YAŞA ENDİRMƏK lazımdır

 

 

Xəbər verdiyimiz kimi, Azərbaycanda hərbi xidmətə çağırış müddətinin yuxarı həddi 35 yaşdan 30 yaşa endirilməsi ehtimalı var. Bu, Milli Məclisin müzakirəsinə təqdim edilən “Hərbi vəzifə və hərbi xidmət haqqında” qanuna təklif edilən dəyişiklikdə əksini tapıb. Hazırda qüvvədə olan qanunvericiliyə görə, hərbi çağırışçılar müddətli həqiqi hərbi xidmət keçməmiş 18 yaşından 35 yaşınadək olan kişi cinsli vətəndaşlardır. Qanuna təklif edilən dəyişkilyə əsasən bundan sonra hərbi çağırışçılar 18 yaşından 30 yaşınadək olan kişi cinsli vətəndaşlar olacaq...

 

Xatırladaq ki, hələ bu ilin iyul ayında sabiq müdafiə naziri, general-mayor Tacəddin Mehdiyev saytımıza açıqlamasında Milli Məclisdə  keçmiş peşəkar hərbçi olanlar da deputat kimi təmsil olunmasının zəruriliyindən danışaraq  məhz bu səbəbdən  hərblə bağlı bir çox qanunlarda çatışmazlıqlar olur. Məsələn, cənab general belə bir sual etmişdi: 

 

“...Müddətli hərbi xidmətə çağırış üçün yaş həddinin 27-dən 35-ə qaldırılmasının mənası nədir? Həmin maddənin qəbulunda peşəkar hərbçi olmuş deputat iştirak etsəydi, bu sualı verərdi və bu yaş həddini artırmağın əhəmiyyətsiz olduğunu əsaslandırardı... Hər üç ildən bir onları çağırıb komissiyadan keçirmək və sağlamlığına-filana görə möhlət müddətini artırmaq nəyə lazımdır? Əvvəlki dövrlərdə yaş həddi 27-yədək idi, hansısa bir problem yaranırdımı?..”

 

 Mövzu ilə bağlı Moderator.az-a budəfəki açıqlamasında isə keçmiş müdafiə naziri bunları söyləyib:

 

“Mən çox şadam ki, nəhayət, Milli Məclisdə hərbi xidmətə çağırış müddətinin yuxarı yaş həddi barədə bizim də verdiyimiz təkliflər qismən eşidildi və müvafiq qanunda həmin həddin 30 yaşadək azaldılması təklif olunur. Amma hesab edirəm ki, bu həddi nəinki 30 yaşa, 27 yaşa endirmək lazımdır. Ötən söhbətlərimizdən birində mən bunu fakt və arqumentlərlə əsaslandırmışdım ki, 27 yaş heç kəsin hərbi xidmətdən kənarda qalmaması üçün kifayət edən bir yaş həddidir. Və bu gün də həmin təklifimin üzərində dayanıram. Bəs indi Milli Məclis üzvləri nəyə əsasən hərbi xidmətə çağırışın yuxarı yaş müddətinin 30 yaşa endirilməsi təklifini verirlər? Bu hansı arqumentlərlə əsaslandırılır?..

 

"Dəyərli hərbi ekspertimi Üzeyir Cəfərovun da bu mövzuda açıqlamasıyla tanış oldum və çox xoşuma gəldi ki, o da çağırış müddətinin yuxarı həddinin heç olmasa 28 yaşa endirilməsini təklif edir...”

 

Əyanilik üçün general-mayor Tacəddin Mehdiyevin hərbi xidmətə çağırış müddətinin 35 yaşdan 27 yaşa endirilməsi ilə bağlı keçmiş açıqlamasını bütövlükdə təqdim edirik:

 

“...Müddətli hərbi xidmətə çağırış üçün yaş həddinin 27-dən 35-ə qaldırılmasının mənası nədir? Həmin maddənin qəbulunda peşəkar hərbçi olmuş deputat iştirak etsəydi, bu sualı verərdi və bu yaş həddini artırmağın əhəmiyyətsiz olduğunu əsaslandırardı. Mən Azərbaycanın müstəqilliyimizin ilk çağlarında işləmiş keçmiş hərbi komissarı kimi bu məsələlərə də yaxşı bələdəm. Hər bir gənc 18 yaşında hərbi xidmətə yollanmalıdır. Onun yalnız bir neçə halda, məsələn, ali məktəbə daxil olduqda, yaxud sağlamlıq vəziyyəti yol vermədikdə hərbi xidmətə çağırışdan möhlət hüququ var. Tutaq ki, hərbi çağırış yaşlı gənclərin 2-3 faizi ali məktəblərə daxil oldu, 2-3 faizi də sağlamlıq göstəricilərinə görə hərbi xidmətə yollanmadı. Bu, Azərbaycan Silahlı Qüvvələrinin planlaşdırılması üçün qorxulu rəqəm deyil. 4 ildən sonra 22 yaşında ali məktəbi bitirən gənc təhsilini artırmaq məqsədi ilə magistiraturaya daxil olmadığı halda hərbi xidmətə yollanmalıdır. Yenə də tutaq ki, ali məktəbi bitirən gənclərdən 2-3 faizi magistiraturaya daxil oldu, qalanları əsgər getməlidir. İki il müddətinə magistiraturanı bitirən gəncin 24 yaşı tamam olur və o, doktoranturaya(keçmişdə aspirantura) daxil olmadığı təqdirdə hərbi xidmətə yollanmalıdır. Yenə də 24 yaşlı ali təhsilli gənclərin çox cüzi faizi doktoranturaya daxil olur və qalanları hərbi xidnmətə yollanır.  İki ildən sonra doktoranturanı bitirib dissertasiya müdafiə edərək fəlsəfə doktoru(keçmiş elmlər namizədi) adını ala  bilən cüzi sayda gənclər yenə də hərbi xidmətdən möhlət hüququ qazanır, qalanları isə hərbi xidmətə yollanır. Bir sözlə, artıq 27 yaşadək bu proseslər hamısı bitir. Belə olduğu halda çağırışçılar üçün yaş həddini 35 yaşadək qaldırıb insanları incitməyin nə mənası var. Hər üç ildən bir onları çağırıb komissiyadan keçirmək və sağlamlığına-filana görə möhlət müddətini artırmaq nəyə lazımdır? Əvvəlki dövrlərdə yaş həddi 27-yədək idi, hansısa bir problem yaranırdımı? İnsanları süni şəkildə dövlətdən narazı salmaq olmaz...”