31 Dekabr – Dünya Azərbaycanlılarının Həmrəyliyi Günü

31 Dekabr – Dünya Azərbaycanlılarının Həmrəyliyi Günü Azərbaycanın ən mühüm milli bayramlarından biri olmaqla yanaşı, dünya azərbaycanlıları arasında birlik və həmrəylik bağlarını möhkəmləndirən xüsusi əhəmiyyətə malikdir.

Musavat.com xəbər verir ki, bu tarixi bayramın əsası 1989-cu ilin dekabrında, Naxçıvanda SSRİ və İran arasındakı sərhəd dirəklərinin sökülməsi ilə qoyulub. Bu hadisə həm Şimali, həm də Cənubi Azərbaycan arasında mənəvi birliyin simvolu oldu. Eyni zamanda, həmin dövrdə İstanbulda keçirilən türkdilli xalqların konfransında dünya azərbaycanlılarının həmrəylik gününün qeyd olunması qərara alındı. Nəticədə, 1991-ci il dekabrın 16-da Ulu Öndər Heydər Əliyevin təşəbbüsü ilə Naxçıvan Ali Məclisi 31 dekabrı Dünya Azərbaycanlılarının Həmrəyliyi Günü elan etdi.

Bu gün dünyanın hər yerində yaşayan azərbaycanlılar tərəfindən əlamətdar bayram kimi qeyd olunur. Həmrəyliyin rəmzi olaraq, yalnız milliyyətcə azərbaycanlılar deyil, Azərbaycanda doğulub böyümüş digər xalqların nümayəndələri də bu bayrama qatılır.

Son illərdə Azərbaycan xalqı həmrəylik və birlik sayəsində böyük zəfərlər qazanıb. 2020-ci ilin 44 günlük Vətən müharibəsində Azərbaycan Ordusu işğalda olan torpaqlarını azad edərək ərazi bütövlüyünü bərpa etdi. Bu tarixi qələbə xalqın həmrəyliyinin gücünü bir daha təsdiqlədi.

2023-cü ilin sentyabr ayında keçirilən antiterror əməliyyatı isə Azərbaycan Ordusunun peşəkarlığını və gücünü bir daha sübut etdi. Əməliyyat qısa müddət ərzində uğurla başa çatdı, dövlət suverenliyi tam bərpa olundu və separatçılığa son qoyuldu.

Azərbaycan Prezidenti İlham Əliyev 2023-cü il oktyabrın 15-də Xankəndidə dövlət bayrağını ucaldaraq bu tarixi nailiyyəti qeyd etdi. Prezident bildirib: "Biz tarixi ədaləti bərpa etdik. Bu gün Azərbaycan bütün ərazisinə nəzarət edir və bu nailiyyətlərin səbəbkarları qəhrəman hərbçilərimizdir."

Dünya azərbaycanlıları həm Vətən müharibəsi dövründə, həm də sonrakı proseslərdə Prezident İlham Əliyevin ətrafında sıx birləşərək öz həmrəyliklərini nümayiş etdirdilər. Bu gün Azərbaycan xalqı qürurla öz gücünü dünyaya göstərir və həmrəylik bayrağını uca tutur.

Dünya Azərbaycanlılarının Həmrəyliyi Günü münasibətilə hər kəsi təbrik edir, xalqımıza birlik, xoşbəxtlik və rifah arzulayırıq!