Şəfqət və mərhəmət ayı...

Artıq Ramazan ayının astanasındayıq desək, yəqin ki, səhv etmərik…

On bir ayın sultanı adlanan Ramazanı digər aylardan fərqləndirən bir çox xüsusiyyətlər, bir çox fərqlər var. Sosial baxımdan yanaşdıqda Ramazan ilk növbədə cəmiyyətdə kasıbla varlının, acla toxun, imkansızla imkanlının, xəstə ilə sağlamın, kəndli ilə şəhərlinin bir-birinə yaxınlaşdığı, əl uzatdığı, qarşı tərəfin halından, dərdindən xəbər tutduğu aydır.
Bu ayda qəribə mənzərələr ortaya çıxır. Ziddiyyətlər bir-birinə yaxınlaşır, qonşu olur və çiyin-çiyinə yoldaş olub bir niyyətə, bir ünvana yola çıxır. Bu ay insanın özünün belə xəbəri olmadan içində gəzdirdiyi gözəl hisslərin, gözəl duyğuların üzə çıxdığı mübarək zaman dilimidir. Bu ayda oruc tutan varlılar yoxsulları xatırlamaqla kifayətlənmir, ürəklərində onlara qarşı şəfqət hiss edirlər.
Bəli, Ramazan fərqli bir mənəvi iqlimdir. Bu iqlimə özünü hazırlayanlar, heç şübhəsiz, ondan xeyir görür, fayda əldə edirlər.
Ramazan cəmiyyətdə yoxsulluğun, aclığın aradan qaldırılması üçün də həm çox gözəl bir fürsət, həm də çox gözəl bir vasitədir. Bu gözəl ayda könül xoşluğu qazanmaq üçün sağımızın-solumuzun dərdini öyrənməyə, bütün qonşularımızla hal-əhval tutmağa, onların ağrı-acılarını bölüşməyə çalışmalıyıq.
Bu ayda həm də müsəlmanlar bir yol tapıb əl tutmağa, yardım etməyə çalışırlar. Ramazan ayında onlar “Qonşusu ac ikən tox yatan bizdən deyil” hədisinin incəliyini daha dərindən dərk edirlər. Süfrələrindəki nemətləri bölüşməklə bu ayın sevincini də bölüşürlər.
Ramazan ayının bu xüsusiyyəti sosial ədalətin bərqərar olmasında da az rol oynamır.
Ramazan həm də insanların dərdlərini bölüşdüyü, bölüşdükcə də azaldığı zaman dilimidir.
Bu mübarək ay həm süfrələrimizin, həm də ürəklərmizin bərəkət mövsümüdür. Bu ayın bütün gözəlliklərini yaşamaq üçün bu mübarək mövsümə gərək ürəkdən hazırlaşa, onun iqliminə, onun atmosferinə gərək ürəkdən bağlanasan.
Ramazanın bütün zövqünü, ləzzətini yaşamaq diləyi ilə!..