Qoşqar Təhməzlinin təsisçisi olduğu şirkət nazirliyin tenderini uddu

12 fevral 2025 17:58

Qoşqar Təhməzlinin təsisçisi olduğu şirkət nazirliyin tenderini uddu

Səhiyyə Nazirliyi "Medeks" şirkəti ilə satınalma müqaviləsi bağlayacaq. 
Qaynarinfo-nun məlumatına görə, şirkət nazirliyin laboratoriya avadanlığının və reagentlərin satın alınması ilə bağlı keçirdiyi tenderin qalibi seçilib. 
Tərəflər arasında bağlanacaq satınalma müqaviləsinin maliyyə dəyəri 114 870 manatdır. 
Nazirlik bu məbləğə 3 ədəd hematalogi analizator, 3 ədəd sentrifuqa və 39 dəst qan sayım cihazı almağı planlaşdırır. 
"Medeks" şirkəti 2006-cı ildə təsis edilib. Şirkətin təsisçisi 2017-ci ildən Qida Təhlküəsizliyi Agentliyinə (AQTA) rəhbərlik edən Qoşqar Təhməzlidir. O, 2008-2016-cı illərdə şirkətin direktoru vəzifəsində çalışıb. Hazırda şirkətə Elşən Yusif oğlu Abbasov rəhbərlik edir. "Medeks" MMC-nin nizamnamə kapitalı 1000 manatdır. 
 
Şirkətin hüquqi ünvanı Nərimanov rayonu, İsmayıl Hidayətzadə küçəsi, məhəllə 1911-də yerləşir. Qoşqar Təhməzli də Nərimanov rayonunda qeydiyyatdadır. 
"Medeks" şirkətinin fəaliyyət istiqaməti tibbi, kosmetoloji, laborator, spa və sanator-kurort avadanlıqlarının satışı, texniki servisi, eləcə də tibbi sərfiyyat mallarının satışından ibarətdir. 
Qoşqar Təhməzli Mənzil İnşaatı Dövlət Agentliyinin tabeliyində fəaliyyət göstərən "MİDA" MMC-nin rəhbəri Fərhad Təhməzovun qardaşıdır. 
Onun digər qardaşı Atış Təhməzli isə "6-cı mərtəbə" şirkətinin rəhbəridir. Bu şirkət "Şərq Bazarı” kompleksinin bərpa və yenidənqurma işləri ilə bağlı borc qalmaqalı gündəmə gəlmişdi. Həmin vaxt subpodratçı şirkətlər podratçı şirkət olan "6-cı mərtəbə”nin onlara külli miqdarda borcu olduğunu, lakin bu borcun ödənilmədiyini bəyan etmişdi. 




Oxşar xəbərlər
Xəbər lenti
Sorğu
Müharibən başlamasını istəyirsinizmi?

Səs ver Nəticələr


Cəmi səslər: 1374