Bəşər Əsədin oğlu Hafez Əsəd DАNIŞDI

Suriyanın keçmiş prezidenti Bəşər Əsədin oğlu Hafez Əsəd ötən ilin dekabrın 8-də atasının hakimiyyətinin devrilməsinin və ailənin ölkəni tərk etməsinin detallarını açıqlayıb.

“Qafqazinfo” xəbər verir ki, Hafez Əsəd bununla bağlı teleqram kanalında paylaşım edib. 

Onun sözlərinə görə, vəziyyətin gərginləşməsindən bir gün əvvəl paytaxt Dəməşqdə vəziyyət stabil olub. Belə ki, dekabrın 7-də qardaşı Kərim hətta universitetdə imtahan verib, şəhərdə isə ayrı-ayrı yerlərdə atəş səslərinin eşidilməsinə baxmayaraq, asayiş normal olub. O bildirib ki, lakin daha sonra Suriya ordusunun Homsdan gözlənilmədən geri çəkilməsi barədə məlumat gəlib və bu, hakimiyyətin devrilməsinə dair bir siqnal olub. 

Hafez əlavə edib ki, bunun ardınca digər şəhərlərdən də oxşar xəbərlər gəlib. 

Bəşər Əsədin oğlu vurğulayıb ki, dekabrın 7-dən 8-nə keçən gecə onların evlərinə yüksəkvəzifəli rusiyalı məmur gələnə qədər ailənin ilk olaraq ölkədən qaçmaqla bağlı hazırlıqları olmayıb. Həmin şəxs Bəşər Əsədə Dəməşqdəki təhlükəli vəziyyət səbəbindən müvəqqəti olaraq Latakiyada yerləşməyi məsləhət görüb. Belə ki, Əsəd buradan hərbi əməliyyatlara rəhbərlik etməyə davam edə bilərdi.  

O əlavə edib ki, Əsəd ailəsi gecə 03:00 radələrində Dəməşq beynəlxalq hava limanına gəlib və burada Bəşər Əsədin qardaşı Mahis əl-Əsədlə görüşüblər. Onları daha sonra buradan Rusiyaya məxsus hərbi təyyarə ilə Latakiya yaxınlığında yerləşən və Rusiya ordusunun nəzarətində olan Hmeimim aviabazasına təxliyə ediblər. 

Bunun ardınca, ailə Latakiyanın şimalında Burc-Salam kəndində yerləşən prezident iqamətgahına yollanmağı planlaşdırsa da, məkana cavabdeh olan yerli məmurlarla əlaqə kəsilib. Buna paralel olaraq, Suriya ordusunun geri qalan mövqelərdən də geri çəkildiyi barədə məlumat daxil olub. Hafezin sözlərinə görə, həmin an müxalif qüvvələr pilotsuz uçuş aparatları ilə Hmeimim aviabazasına hücum etməyə başlayıb, bazanın yaxınlığında isə atəş səsləri eşidilib. 

Axşam saatlarında isə bazanın rəhbərliyi təhlükənin artdığı barədə ailəyə məlumat verib, rusiyalı hərbçilər isə müxalif qüvvələrin yaxınlaşması səbəbindən bazanı tərk etməyi tövsiyə ediblər. Paylaşımda bildirilib ki, Əsəd ailəsi Rusiya rəhbərliyi ilə məsləhətləşmələrdən sonra 2024-cü il dekabrın 8-də Rusiya hərbi təyyarəsi ilə Suriyanı tərk ediblər. 

Xatırladaq ki, ötən il noyabrın 27-də Suriyanın müxalif silahlı birləşmələrinin üzvləri Hələb və İdlibdə hökumət qüvvələrinə qarşı genişmiqyaslı hücuma başlamışdı. Dekabrın 7-də Bəşər Əsədə qarşı olan qruplaşmalar bir neçə iri şəhərə nəzarəti ələ keçirib, dekabrın 8-də isə Dəməşqə daxil olublar. Bunun ardınca isə Suriya ordusunun bölmələri paytaxtı tərk edib. Əsəd isə öz növbəsində prezident postunu və ölkəni tərk edib. Daha sonra, onun və ailəsinin Rusiyada olduğu məlum olub.