Zabil Müqabiloğlu adlı bir jurnalist vardı... - ANIM GÜNÜ

26 fevral tarixi həyatdan vaxtsız köçən mərhum jurnalist Zabil Müqabiloğlunun anım günüdür.

Modern.az-ın məlumatına görə, Zabil Müqabil oğlu Nəcizadə 1977-ci il noyabrın 17-də Zəngilan rayonunun Babaylı kəndində müəllim ailəsində anadan olub. Bakı Asiya Universitetinin Jurnalistika fakültəsini bitirib.
1993-cü ildə ailəsilə birgə Zəngilan rayonundan məcburi köçkün düşüb

1996-1998-ci illərdə hərbi xidmətdə olub. 1998-ci ildən vəfat etdiyi günə kimi mətbuatda çalışıb.

"525-ci qəzet", "Avropa", "Tərcüman", "Yeni Müsavat" qəzetlərində işləyib. Zabilin sonuncu iş yeri özünün yaratdığı Gunxeber.com saytı olub, həmin internet resursunun baş redaktoru işləyib.

Zabil Müqabiloğlu 26 fevral 2017-ci il tarixində müalicə aldığı 1 saylı Şəhər Kliniki Xəstəxansında keçinib. 40 yaşında dünyasını dəyişən həmkarımız qaraciyər serrozundan əziyyət çəkirdi. 

Mərhum jurnalist Pirşağı qəbiristanlığında, valideynlərinin yanında torpağa tapşırılıb.

Onun bir oğul övladı yadigar qalıb. 

Mediada imzası yetəri qədər tanınmış Z.Müqabiloğlu jurnalist fəaliyyəti ilə yanaşı, seirlər də yazırdı. .
Mərhumun ölümündən sonra "Son zəng" adlı kitabı çapdan çıxıb. Kitabda Zabilin xarici səfərlərdə, bir çox yerli tədbirlərdə çəkdirdiyi şəkillər, şeir və hekayələri, yaxın dostlarının xatirələri yer alıb.

Z.Müqabiloğlu özünün zəhmətkeşliyi ilə yanaşı, həm də vətənpərvərliyi ilə də nümunə olub. Mərhum həmkarımız Vətən, torpaq niskilini də qəlbində daşıyan biri idi. Bu cəhət onun yaradıcılığına da təsir göstərirdi. Zabilin ən böyük arzulardan biri Qarabağa, doğma Zəngilana qayıtmaq idi. Təəssüf ki, ömür vəfa etmədi.