“ “PKK” lideri Abdullah Öcalanın son müraciətinin əməli təsirini, nəticəsini qiymətləndirmək üçün mütləq baxmaq lazımdır ki, indiki mərhələdə kürd dövləti, kürd vətəni, kürd müstəqilliyi məsələsi nə yerdədir. Hazırda Öcalan 26 ildir ki, İmralı adasında həbsxanadadır, amma bu müddətdə kürd müqaviməti davam edir, genişlənir, yeni əraziləri tutur. Niyə? Çünki arxasında Amerika dayanıb”. 

 

Bunu Moderator.az-a açıqlamasında terrorçu “PKK” lideri Abdullah Öcalanın öz tərəfdarlarına silahı yerə qoyaraq Türkiyəyə inteqrasiya olunmaq çağırışına münasibət bildirərkən politoloq Zərdüşt Əlizadə söyləyib.

 

“Məgər Öcalanın müraciətindən sonra ABŞ və onun 51-ci ştatı olan İsrail öz niyyətindən əl çəkəcək? Öcalan o dərəcədə nüfuz sahibidir ki, onun  bir sözü ilə Amerikanın, İsrailin kəşfiyyatlarının kürd məsələsi ilə bağlı təxribatçı hərəkatlarına son qoyulacaq. Elə deyil. Mən əminəm ki, kürd müqavimət hərəkatında Öcalana hörmət edən, onun sözünə qulaq asanların sayı çox azdır. Bəli, o, azadlıqda olanda, hərəkata əməli şəkildə başçılıq edəndə, əməliyyatlara rəhbərlik edəndə sözü keçirdi. Amma artıq Öcalan neçə onilliklərdir həbsxanada olduğundan onun hərəkata təsir imkanları azdır. Və hazırda kürd hərəkatının yeni ağası var – bu, Amerika Birləşmiş Ştatlarıdır. ABŞ-nin də mövqeyi bəllidir.  O istəyir ki, strateji əhəmiyyəti olan Yaxın Şərq bölgəsini itaətdə saxlasın. Bunun üçün isə üçayaqlı bir konstruksiya lazımdır. Həmin qurğunun bir qıçı İsraildir. İsraili artıq Amerika kifayət qədər gücləndirib, möhkəmləndirib, faktiki nüvə silahı da var.  Artıq bəzi satqın ərəb və müsəlman dövlətləri onu tanıyır, qəbul edir, onunla əlaqələr qurur, onun işğalçılıq siyasətini qəbul edirlər”, -deyə davamında politoloq bildirib.

 

“ABŞ xeyli vaxtdır, çalışır ki, dediyimiz qurğunun ikinci qıçı Ermənistan olsun. Ermənistanı Rusiyadan qoparmaq, Amerikanın hərbi bazasına çevirmək, onun vasitəsilə Türkiyə, Gürcüstan, Azərbaycan, İran üzərində nəzarəti həyata keçirmək istəyir. Bu, onun ikinci istəyidir ki, hələlik baş tutmayıb... 

 

Üçüncü layihə də “Böyük Kürdüstan”dır ki, əgər o qurulsa, İsraildən də betər ABŞ-nin nökəri, qulbeçəsi, aləti və forpostu- ön istehkamı olacaq.  Deyilən plan nəticəsində  Amerika İraqın şimalını qoparıb orada bir kürd muxtariyyəti yaradıb.  Hazırda Suriyanın şimal-şərqindəki qruplaşmalarını silahlandırıb təlim keçərək hərbi birləşmələr formalaşdırıb və onların vasitəsilə ölkə ərazisinin təxminən 30 faizini, o cümlədən də neft mədənləri olan ərazilərini ələ keçiriblər. Həmçinin vaxtilə SSRİ-nin tikdiyi Tapka səddini də tutublar. Və amerikanlar həmin ərazilərdə də bir kürd muxtariyyəti yaratmaq istəyir. Buna da, əlbəttə ki, suriyalılar razı deyil. Amma onlara kimdi baxan... ABŞ-nin bu layihəsini puç eləmək üçün Türkiyə və ərəb dövlətləri, heç olmasa, Suriya məsələsində bir olmalıdırlar. Hələlik bu birlik də görünmür. “Ayır-buyur” siyasəti öz işini görür... 

 

Bütün bunları nəzərə alaraq demək olar ki, Öcalanın belə bir müraciət etməsini alqışlayırıq: ağlı başına gəlib, həbsxanada xeyli kitab oxuyub və real vəziyyəti dəyərləndirərək belə nəticəyə gəlib ki, silahlı müqavimətin xeyri yoxdur... Bununla belə, onun müraciəti gözəl müraciət olsa da, real təsiri, nəticəsi yoxdur və olmayacaq. Çünki hazırda kürd müqavimət hərəkatına yanlış şüarlar altında başqa qüvvələr, ilk növbədə ABŞ və İsrail nəzarət edir. Bəli, müəyyən müddətə hansısa qruplaşmalar silahı yerə qoya, atəşkəs elan edə bilər, amma bütövlükdə bu proses dayanmayacaq”,- deyə Zərdüşt Əlizadə diqqətə çatdırıb.