Tаnınmış аlimin Аli Məhkəmənin sədrinə, Bаş prokurorа MÜRАCİƏTİ

Mən Sizə bir Azərbaycan qadını, jurnalist, pedaqoq, elm və təhsil işçisi, üç övlad anası kimi müraciət edərək kimlərinsə sifarişi ilə, heç bir sübut olmadan külli miqdarda psixotrop maddə olan metamfetamini satma ittihamı ilə şərlənərək tutulan, hazırda Bakı Ağır Cinayətlər Məhkəməsində hakim Səbinə Məmmədzadənin sədrliyi ilə barəsində AR CM-nin 234.4.3 maddəsi ilə olan cinayət işinə baxılan Nəhmətov Azad Adil oğlunun həyat yoldaşı kimi müraciət edərək onun barəsində olan qurama cinayət işini nəzarətə götürmənizi və iş üzrə ədalətli, obyektiv qərar qəbul edilməsini təmin etmənizi xahiş edirəm.

Belə ki, qurama ittihama görə Nəhmətov Azad Adil oğlu istintaqa məlum olmayan tarixdə və mənbədən satış məqsədi ilə qanunsuz olaraq külli miqdarda təmiz çəkisi 10,320 qram ağ rəngli, kristalşəkilli kütlə kustar üsulla hazırlanmış psixotrop maddə metamfetamini 5 ədəd gümüş rəngli kağız bükümdə əldə edərək əynində olan tünd yaşıl rəngli gödəkcənin sağ yan cibində saxlamaqla üzərində daşımış, 28 fevral 2024-cü il tarixdə saat 14:00-da Bakı şəhər Binəqədi Rayon Polis İdarəsinin 6-cı Polis Bölməsinin əməkdaşları tərəfindən keçirilən əməliyyat-axtarış tədbirləri nəticəsində Bakı şəhəri, Binəqədi Rayonu, Biləcəri qəsəbəsi, Natavan küçəsində yerləşən “Tovuz” kafesinin qarşısında saxlanılaraq Bakı şəhəri, Binəqədi Rayonu, Biləcəri qəsəbəsi, Y.Hüseynov 65 ünvanında yerləşən həmin Polis Bölməsinə gətirilmiş və həmin tarixdə saat 15:30-da üzərində aparılan şəxsi axtarış və götürmə zamanı əynində olan tünd yaşıl rəngli gödəkcənin sağ yan cibindən 5 ədəd gümüş rəngli kağıza bükülmüş, satış məqsədi ilə qanunsuz olaraq əldə edib saxlamaqla üzərində daşıdığı ayrı-ayrılıqda təmiz çəkiləri 2,052 qram, 1,928 qram, 1,970 qram, 2,082 qram və 2,288 qram olmaqla öz aralarında kimyəvi komponent tərkiblərinə görə eynilik təşkil edən, külli miqdarda ümumi təmiz çəkisi 10,320 qram ağ rəngli, kristalşəkilli kustar usulla hazırlanmış psixotrop maddə metamfetamin aşkar edilərək götürülmüşdür.

Hörmətli İnam müəllim, həyat yoldaşım Azad imanlı bir şəxs olmaqla heç bir vaxt spirtli içki içməmiş, dərdi olmadıqca, hətta siqaret belə çəkməmişdir ki, nəinki narkotik vasitədən istifadə etsin, ya da kimə isə satsın. O nümunəvi bir valideyn kimi həm öz övladlarının, həm də ahıl, xəstə ata və anasının qayğısını çəkən, ailəsi üçün yaşayan bir şəxsdir. Onun hər hansı bir zərərli vərdişi belə olsaydı, ən azından mənim xəbərim olardı. Bu günə kimi onun nə üçün şərlənib tutulması bizim ailəmiz üçün bir müəmma olaraq qalır.

Məhkəmə baxışının gedişində müqavilə əsasında tutduğumuz vəkil 03.10.2024-cü il tarixdə Nəhmətov Azad Adil oğlu ilə saxlandığı BİT-də görüşərkən Azad vəkilinə ona verilən ittihamın tamamilə saxta olmaqla metamfetamini Binəqədi RPİ-nin 6-cı PB-nin əməkdaşları tərəfindən tutulub bölməyə gətiriləndən sonra üzərində axtarış aparılmazdan əvvəl üzərinə qoyulduğunu, ittiham aktında yazılanların işin həqiqi hallarına zidd olmaqla həqiqəti əks etdirmədiyini, istintaq zamanı onun adından yazılan ifadələri, o cümlədən üzərində aparılan şəxsi axtarışı əks etdirən protokolu 6-cı PB-nin rəisi Cövdət və əməliyyat müvəkkili Vüqar Cavadov tərəfindən ona edilən psixoloji təzyiq və 85 yaşlı xəstə atası Adilin yaşadığı evdə axtarış aparılıb odlu silah tapacaqları hədə qorxusu altında imzalamağa məcbur olduğunu demişdir. O həmçinin istintaq zamanı qorxusundan heç bir şikayət etməmiş, məhkəmə baxışında həqiqəti söyləyib bəraət alacağını düşünmüş və məhkəmədə heç bir cinayət əməli törətməməsini, üzərindən tapılması qeyd olunan metamfetamini 6-cı PB-də üzərinə qoyulduqdan sonra müdafiəçinin iştirakı olmadan 28 fevral 2024-cü il tarixdə saat 15:30-da deyil, saat 21 radələrində üzərində axtarış aparıldığını, onun tutulmasında və saat 15:30-da üzərində axtarış aparılmasında iştirak etməsi göstərilən sahə müvəkkili Nəsimi Əliyevi saat 21 radələrində üzərində faktiki olaraq axtarış aparılanda gördüyünü, müdafiəçini görmədiyini, müdafiəçinin ona təqdim edilməməsini, müdafiəçinin iştirakı ilə heç bir sənədə imza etmədiyini, həmin sənədləri sonradan ona təklikdə imza etdirdiklərini, hətta istintaqın başa çatmasında da müdafiəçinin iştirak etmədiyini, cinayət işinin materialları ilə nə təklikdə, nə də müdafiəçi ilə birlikdə tanış olmadığını, müstəntiqin ona, sadəcə, sənədləri imza etdirdiyini bildirmişdir.

Müdafiəçi tərəfindən əməliyyat müvəkkili Vüqar Cavadovun, sahə müvəkili Nəsimi Əliyevin və müdafiəçi Vahid Məmmədovun istifadələrində olan mobil telefonlara dair çıxarışların anten məlumatları da göstərilməklə alınması barədə vəsatəti əsassız olaraq təmin edilmədi. Müdafiəçinin bu vəsatəti təmin edilməsə, Azad Nəhmətovun təqsirsiz olması, şərlənərək tutulması sübuta yetməyəcək. Günahsız şəxs, onun müdafiəçisi sehrbaz deyildir ki, sehr göstərərək zamanı geri qaytarıb baş verənləri səhnədə canlandırsınlar. Bunun yeganə yolu vəkilin vəsatətini təmin edib adıçəkilən şəxslərin mobil telefonlarının anten məlumatlarının əldə edilməsi yoludur ki, bununla da Sahə müvəkkili Nəsimi Əliyevin Azad tutulan saatda və üzərində axtarış aparılanda, habelə müdafiəçinin 28 fevral 2024-cü il tarixdə saat 15:20-də 6-cı PB-də Azadın olduğu yerdə olub-olmaması müəyyən edilsin.

Hörmətli İnam müəllim, həyat yoldaşım Azad Nəhmətovun barəsində olan cinayət işində o qədər kobud qanun pozuntularına yol verilib ki, saymaqla bitməz. Ona görə də, bir daha Sizdən onun barəsində olan cinayət işini öz nəzarətinizə götürmənizi, vəkilimizin verdiyi vəsatətlərin təmin edilməsini və sonda obyektiv və ədalətli hökm çıxarılmasını təmin etmənizi xahiş edirəm.