Axı niyə bir azərbaycanlı professor erməni çıxmalıdır - Elbəyi Həsənli Altay Göyüşovu suçladı

İsveçrədə yaşayan tanınmış jurnalist Elbəyi Həsənli bir yazı paylaşıb. Həmin yazıda o, mühacirətdə olan azərbaycanlı professor Altay Göyüşovu çox sərt şəkildə qınayıb.

"Niyə, nə üçün, səbəbi nədir", soruşanlar üçün yazını olduğu kimi rəqdim edirik.

***

Ötən il Facebokda bir status paylaşmışdım. Həmin statusu bir çox saytlar “Azərbaycanlı professor erməni çıxdı” başlığı ilə yaymışdı. Söhbət Altay Göyüşovdan gedirdi. Mənim Altay bəylə xüsusi bir şəxsi-qərəzliyim yoxdur. Problem ondadır ki, Qərb mediası Azərbaycanla bağlı bu və ya digər məsələyə onun münasibəti ilə maraqlanır. O da sualları radikal müxalif mövqedən cavablandırır. Yaxşı edir. Mənim bununla bir işim yox.
Ancaq hörmətli Altay bəy bəzən barıtı o qədər çox edir ki, hətta Ermənistan Azərbaycan münasibətlərində yaranmış durğunluğa görə də rəsmi Bakını atəşə tutur.

Elə 1 il əvvəlki statusum da bu barədə idi. Düşünün ki, kanadalı jurnalist Neil Hauer “intellinews.com”saytında bir məqalə ilə çıxış etmişdi. Sırf ermənipərəst mövqedən bir yazı ortaya qoymuşdu. Öz arqumentlərini sübut etmək üçün erməni və azərbaycanlı siyasi ekspertdən də rəy öyrənmişdi. Erməni siyasi ekspert Gevorg Melikyan da Neil Hauer-in dediklərinə qüvvət vermişdi. Bizim professor da onlarla eyni xorda yer almışdı. Neil Hauer+Gevorg Melikyan+Altay Göyüşov səs-səsə verib Azərbaycanı bütün yaramazlıqlarda ittiham etmişdi...

İndi nə edib? Deməli, sayın professor Stella Meqrabekyana müsahibə verib. Nə deyib? Deyib ki, Bakıda məhkəmə qarşısına çıxarılan separatçı ermənilər siyasi məhbusdur...

Mən bildiyim qədər söz, ifadə, vicdan, din və sərbəst toplaşmaq azadlıqları uğrunda mübarizə aparan insanlar həbsə atılanda onlar siyasi məhbus kimi təsnif edilir. Bu separatçılar əllərində silah Azərbaycana qarşı döyüşüblər. Yəni bunlar terrorçudur.

Azərbaycanın suverenliyinə və ərazi bütövlüyünə qarşı mübarizə aparan separatçıya biz hansı məntiqlə siyasi məhbus deməliyik?
Bəli, Ermənistandakı bəlli dairələr Bakıda mühakimə olunan terrorçulara siyasi məhbus yarlığı yapışdırmağa çalışırlar. Mən bunu anlayışla qarşılayıram, çünki onlar ermənidirlər. Ancaq bir azərbaycanlı professorun Azərbaycana düşmən olan radikal separatçıları siyasi məhbus adlandırması mənə pis təsir edir. Çünki ermənilərə xoş gəlmək üçün bir azərbaycanlı Azərbaycana şər atır. Axı niyə bir azərbaycanlı professor erməni çıxmalıdır. Heç nə. Bu adam Qərbin müxtəlif fondlarından maliyyə dəstəyi alır.

Ay qurban olum sizə. Mən də gedib o fondlardan pul-para alım, sonra da başlayım ermənilərə xatir Azərbaycanı ittiham etməyə. Tüpürəsən belə həyata. Belə yaşamaqdansa, ölmək daha yaxşı deyilmi?...

Elbəyi HƏSƏNLİ, SÜRİX