Məni danlayıb dedi ki... – Eldar Namazov sirləri açdı

Prezidenti Aparatı Katibliyinin keçmiş rəhbəri Eldar Namazov RTV-yə müsahibəsində mərhum Heydər Əliyevlə bağlı xatirələrini danışıb.

Yenisabah.az xəbər verir ki, o, sabiq prezidentlə çalışdığı dövrdə başına gələn maraqlı bir əhavalatı danışıb:

“Heydər Əliyev nadir hallarda mənim işimdən narazılığını bildirib. Bir dəfə dedi: "Axı sən pis proses olacağını bunu mənə demişdin, sonra bir daha xəbərdarlıq etdin. Bəss niyə üstünə düşmədin?"

Dedim ki, cənab Prezident, mən 2 dəfə sizə məruzə etdim. Dedim ki, belə bir təhlükəni görürəm. Siz isə dediniz ki, yaxşı, fikirləşərəm.

Bir neçə həftədən sonra məsələni yenə yadınıza saldım. Dediniz ki,  yanımda işləyən başqa adamlar deyir ki, hər şey əladır, problem yoxdur.

O zaman Prezident məni danladı, dedi, gərək axıra kimi dirənəydin. Dedim, bu haqda 3 dəfə sizinlə danışmışdım. Dedi, əgər əmin idinsə belə bir təhlükə var, onda 4-cü, 5-ci dəfə də sözünü deməliydin. Əgər daxili əminlik varsa, gərək axıra kimi gedəsən.

Hamının gözünün qabağında dediyim baş verdi. Prezident cəzalandırdığı adamlara dedi ki, işçiləriniz sizi aldadır, siz də məni aldadırsınız.

Prezident bir dəfə iclas yığdı, soruşdu, vəziyyət nə yerdədir? Dedilər, hər şey əladır. Həmin axşam bəlli oldu ki, vəziyyət çox pisdir. Ertəsi gün prezident yenidən hamımızı yığdı. Dedi, bəs dünən deyirdiniz hər şey əladır? Axşam isə bəlli oldu ki, elə deyil.

Bütün bu məsələlərlə bağlı mən 6 ay əvvəl xəbərdarlıq etmişdim. İkinci iclasda dedilər ki, öyrəndik, hər şey yaxşıdır. Prezident də dedi ki, yaxşı. Həmin axşam bəlli oldu ki, bu məsələ də vəziyyət 180 dərəcə fərqlidir. Artıq üçüncü gün o, həmin adamları yığıb dedi ki, bu nə deməkdir? Hər gün iclas keçirirəm və dedikləriniz yalan çıxır. Deməli, işçiləriniz sizə yalan məlumatlar verir, siz də həmin yalanları mənə danışırsınız”.

Eldar Namazov həmin dövrdə keçmiş Prezident Aparatı rəhbəri Ramiz Mehdiyevlə çəkişməsinə toxunub: 

“Cənab Prezident mənə çox etibar edirdi. Təhlükəsizlik Şurasının ilk iclası zamanı Prezident Aparatının rəhbəri (Ramiz Mehdiyev - red.) də çıxış etdi və dedi ki, Təhlükəsizlik Şurası ilə bağlı fərmanda qeyd olunub ki, Təhlükəsizlik Şurasının katibliyi ilə bağlı biz sizə öz təkliflərimizi hazırlayaq. Cənab Prezident dedi ki, ehtiyac yoxdur, Eldar var və bu məsələni icra edəcək.

Mən həm müdafiə, həm təhlükəsizlik, həm də daxili və xarici siyasət məsələləri ilə bağlı işlərə baxırdım. Çox ağır yük idi. Prezident general Tofiq Ağahüseynovu hərb məsələri üzrə köməkçi təyin etdi. Çox sevindim ki, heç olmasa yükümün bir hissəsi ona həvalə olunacaq.

Həmin gün Müdafiə Nazirliyindən 2 məxfi sənəd gəlmişdi. Bütün məxfi sənədləri yalnız mən aça bilərdim. Məktubları Tofiq Ağahüseynova göndərdim. 2 gün keçdi. Prezident mənə zəng edib dedi ki, Səfər Əbiyev zəng edib və 2 təcili məktub göndərdiyini deyir. Son 2 gündə mənim yanımda 5-6 dəfə olmusan. Niyə onları məruzə etməmisən?

Dedim, cənab Prezident, axı hərb məsələlərilə bağlı köməkçi təyin etmisiniz. Mən həmin məktubları ona göndərdim və hər şeyi də başa saldım. Dedi, deyəsən, sən çox sevinmisən ki, yükün azalıb. Dedim, bir az. Dedi, çox nahaq, məktubları gedir götür. Onlara lazım gəlsə, mən nəsə tapşıraram. Həmin vəzifələr səndə qalır. Bu mənada, mən Heydər Əliyevin yanında böyük məktəb keçdim”.

Nazim Hacıyev