Axtarışda olan məşhur milyonçunun oğlu məhkəməni uduzdu - adını da, alimenti də verəcək! - ŞOK QƏRAR

Bakı Apellyasiya Məhkəməsində hakim Fuad Babayevin sədrliyi ilə SOCAR-ın sabiq vitse-prezidenti Mikayıl İsmayılovun oğlu Orxan İsmayılzadənin şikayəti üzrə məhkəmə prosesi yekunlaşıb.

Musavat.com xəbər verir ki, məhkəmə Orxan İsmayılzadənin azyaşlı Nil Abbasovanın atası olması, hər ay övladına 500 manat aliment ödəməsi barədə Sabunçu Rayon Məhkəməsinin qətnaməsini qüvvədə saxlayıb.

Dərhal qüvvəyə minən qərara görə, Orxan İsmayılzadə hər ay 500 manat aliment ödəməli, Nil Abbasovanın şəxsiyyət vəsiqəsində, atasının adı qrafasında “Orxan” yazılmalıdır!

Apellyasiya prosesi zamanı Orxan İsmayılzadənin işə qoşduğu 3 vəkil də məhkəmənin obyektiv qərar verməsinə təsir edə bilməyib. 

Fidan Abbasova uzun müddətdir ki, övladının hüquqlarının bərpası üçün məhkəmələrdə mübarizə aparır.

Sabunçu Rayon Məhkəməsinin qərarına əsasən, Orxan İsmayılzadənin bioloji qohumluğun təyini üçün atalıq testindən keçməsi tələb olunub, lakin o, dəfələrlə bu ekspertizadan yayınaraq məhkəmə proseslərini uzatmağa çalışıb. Həmçinin, Bakı Apellyasiya Məhkəməsi və Xətai Rayon Məhkəməsi də ekspertizanın keçirilməsi barədə qərarlar çıxarıb, amma Orxan İsmayılzadə ekspertizalara qatılmayıb.

Fidan Abbasova hesab edirdi ki, bu addımlar məhkəmənin uzadılmasına xidmət edir və ölkə rəhbərliyindən qızının hüquqlarının müdafiəsinə dəstək verməyi xahiş etmişdi.

“Qarşı tərəfin pul və əlaqələri var, amma mənim övladımın haqqı tapdanmamalıdır. Övladımın hüquqları üçün ən kəskin addımlardan belə çəkinməyəcəyəm”, - deyə Fidan Abbasova bildirmişdi.

Qanuna görə, atalıq testi bioloji qohumluğun müəyyən edilməsi üçün yeganə və elmi əsaslı üsul kimi tanınır. Genetik məlumatın analizi vasitəsilə uşaqla atasının gen bölgələrinin uyğunluğu müəyyən edilir və bu, 99.99% dəqiqliklə bioloji ata olma faktını təsdiqləyir.

Azərbaycanda məhkəmə sistemi də bu ekspertizanın nəticələrinə əsaslanaraq qərar verir.

Fidan Abbasovanın sözlərinə görə, Orxan İsmayılzadənin təyin olunmuş ekspertizalarda iştirak etməməsi özü də bioloji ata olduğunu dolayısı ilə təsdiqləyir. Bu da qanunvericiliyə uyğun olaraq onun ekspertizanın nəticələrini qəbul etdiyini göstərir.

Xatırladaq ki, 2012-ci ildən 2016-cı ilə qədər faktiki nikahda yaşayan tərəflər 2015-ci ildə Nil adlı qız övladı dünyaya gətiriblər. Lakin Orxan İsmayılzadə həm rəsmi nikaha girməyib, həm də uşağın atası olduğunu qəbul etməyib. Məhkəmə qərarlarının icrasını təmin etmək məqsədilə Orxan İsmayılzadənin aliment ödəməməsi səbəbindən onun əmlakına və ölkədən çıxışına məhdudiyyətlər qoyulub, barəsində axtarış elan olunub.