Paşinyan oğlu Aşotu erməni əsirlərin əvəzindən Azərbaycana vermək istəyib...

Ateist Nikol Paşinyan haqqında bilmədiklərimiz

Paşinyan jurnalist Anna Akopyanla evlidir. Onların üç qızı və bir oğlu var. 2012-ci ildən “Haykakan Jamanak”ın baş redaktoru kimi çalışan Akopyan Paşinyanla rəsmi nikahda deyil, onların kilsə mərasimi üzərindən də evliliyi yoxdur. Paşinyan nə vaxtsa bir gün erməni apostol kilsəsində evlənə biləcəklərinə ümid etdiyini bildirmişdi. Hazırda kilsə ilə münaqişədə olan Paşinyanın bu arzusunun baş tutacağı daha az ehtimal olunur.

Onların oğlu Aşot könüllü olaraq 2018- 2020-ci illərdə, hətta müharibə zamanı Qarabağda xidmət edib. 

Paşinyan köhnə müsahiblərinin birində bildirib ki, o və ailəsi Erməni Apostol Kilsəsinin tərəfdarıdır: "Müqəddəs Eçmiədzini vaxtaşırı ziyarət etmək lazımdır. Ora həm də keçmiş və gələcək haqqında düşünmək üçün ən münasib yerdir". Təbii ki, indi o, "Müqəddəs Eçmiədzin" haqqında tamam fərqli fikirdədir...

Orasını da xatırladım ki, Nikol Paşinyan 2021-ci ildə Ermənistanda keçiriləcək parlament seçkiləri üçün təbliğat apararkən, oğlu Aşotu Azərbaycanda saxlanılan bütün erməni əsirləri ilə dəyişmək təklifini irəli sürmüşdü...

Emil Sanamyan yazıb ki, inqilab Paşinyanı “tənha Don Kixotdan Ermənistanı korrupsioner rejimdən “xilas etməyi” bacaran cəngavər Santaya çevirdi”...

Nikol Paşinyan 1 iyun 1975-ci ildə Tavuş vilayətinin şimal-şərqindəki İcevan şəhərində anadan olub. Paşinyanın atası Vova Paşinyan (1940–2020) futbol və voleybol üzrə məşqçisi olub və bədən tərbiyəsi müəllimi kimi çalışıb. Paşinyanın cəmi 12 yaşı olanda anası Svetlana vəfat edib və o, ögey anası Yerjanik tərəfindən böyüdülüb.

Maraqlıdır ki, o, Ermənistan Ordusunda xidmət etməyib, çünki ondan əvvəl iki böyük qardaşı xidmətdə olub və qanunla o, xidmət etməyə borclu deyildi. Paşinyan 1991-1995-ci illərdə İrəvan Dövlət Universitetində (YDU) jurnalistika təhsili alıb. Onu təhsilini başa vurmadan universitetdən xaric ediblər. Paşinyan siyasi fəaliyyətinə görə universitetdən qovulduğunu iddia edib. İrəvan Dövlət Universiteti isə Paşinyanın dərsə gəlmədiyi üçün ali məktəbdən xaric edilməsi barədə bəyanat yayıb. 2015-ci ildə verdiyi müsahibədə Paşinyan bildirib ki, özünü daha çox jurnalist hesab edir, çünki jurnalistika onu siyasətə gətirib...

Hazırda Nikol Paşinyan Erməni Qriqoryan Kilsəsinin rəhbəri II Qaregin (1951) ilə qırğındadır. Baş nazir II Qaregini uşaq sahibi olmaqda suçlayıb. Qriqoryan kilsəsi isə din adamlarına evlənməyi qəti qadağan edib. II Qareginin reputasiyası heç əvvəl də o qədər ürəkaçan olmayıb.

Xatırladım ki, II Qaregin 1999-cu ildə İ Qaraginin (1994–1999) yerinə Erməni Qriqoryan Kilsəsinin rəhbəri seçilib.

Elbəyi HƏSƏNLİ, SÜRİX