Qayıdış Konsepsiyasının reallaşmasında QHT-lər kifayət qədər fəaldırlar - Deputat

Qərbi Azərbaycana Qayıdış Konsepsiyası təbii ki, olduqca vacibdir və milli prioritetlərimiz müstəvisində qərarlaşan önəmli fəaliyyət istiqamətlərindən biridir. Çünki Qərbi Azərbaycana qayıdış həm hüquq nöqteyi-nəzərindən, həm də tarixi ədalətin bərpa olunması baxımından çox mühüm vəzifədir.

Bu barədə 525.az-a Milli Məclisin deputatı Azər Allahverənov QHT-lərin Qərbi Azərbaycana qayıdış istiqamətində rolu və görülən işləri şərh edərkən deyib.

Deputat söyləyib ki, bu vəzifənin icra olunması kifayət qədər çoxşaxəli və çoxsəviyyəli mürəkkəb yanaşmanı, bundan irəli gələn siyasəti özündə ehtiva edir:

“Buna görə də düşünürəm ki, ümummilli məsələ olduğu üçün cəmiyyətin bütün təbəqələri prosesdə bu və ya digər formada iştirak etməlidirlər. Eyni zamanda, bu, prosesdə QHT-lərin iştirakını da mütləq edir. QHT-lər bir neçə səviyyədə konsepsiyanın reallaşmasını təmin edə bilərlər ki, bu, ilk növbədə ölkənin hüdudları daxilində zəruri işlərin həyata keçirilməsini, ikincisi isə ölkə hüdudlarından kənarda fəaliyyəti ehtiva edir. Birinci halda Qayıdış Konsepsiyası var və onun reallaşması üçün strateji xətt mövcuddur. Həmin strateji xəttin əsasını zamanında orada yaşayan və o ərazilərin aborigen əhalisi olan bizim soydaşlarımızın mədəni-mənəvi irsi, orada tarixən mövcud olmuş bütün dəyərlərimiz, toponimlər, adət-ənənələr, tarixi şəxsiyyətlərimiz və digər məsələlər təşkil edir. Mədəniyyət, incəsənət və başqa sahələrdə soydaşlarımızın töhfələri barədə böyük bir bazanın yaradılması kontekstində QHT-lər çox yaxından iştirak edirlər. Sonrakı mərhələdə isə bütün bunların geniş şəkildə təşviq və təbliğ olunmasında mühüm rol oynaya bilərlər”.

A.Allahverənov söyləyib ki, bu resursların beynəlxalq aləmə çıxarılması, Qayıdış Konsepsiyasının tanıdılması sırf beynəlxalq hüququn və tarix ədalətin bərpa olunması baxımından olduqca vacibdir:

“Bilirəm ki, QHT-lər bu prosesdə kifayət qədər fəaldırlar, dövlətin bu sahədə mövcud olan strateji xəttinin aparılmasında həm də QHT-lər töhfə verirlər. Qeyri-Hökumət-Təşkilatlarına Dövlət Dəstəyi Agentliyi “Qərbi Azərbaycana qayıdış”la bağlı keçirdiyi qrant müsabiqələrində mövzunu xüsusilə diqqət mərkəzində saxlayır. Son illərin statistikasına nəzər saldıqda görə bilərik ki, bu sahədə kifayət qədər layihələr olub və onlar dediyim istiqamətləri əhatə edir. Bu işin daha sistemli şəkildə təşkil olunması həm də qurumlararası koordinasiyanın vacibliyini ehtiva edir. Əlaqələndirilmiş şəkildə iş aparmaqla, bu mövzunu xarici müstəvilərə çıxararaq, tədbirlər keçirməklə, beynəlxalq təşkilatların prosesdə yaxından iştirakına nail olmaqla faktiki Qərbi Azərbaycana qayıdış Konsepsiyasını beynəlxalq tərəfdaşların diqqətinə çatdıırlmasını təmin etmək olar. Bu istiqamətdə QHT-lər fəaliyyət göstərirlər. Amma bu işi daha da intensivləşdirməyə ciddi ehtiyac var, o baxımdan ki, olduqca vacibdir ki, tək Agentlik yox, digər donorlarımız da prosesdə fəal iştirak edib, öz töhfələrini versinlər. Çoxsayda dövlət qurumları var ki, onlar bu tipdə layihələri maliyyələşdirə bilərlər, eyni zamanda biznes sektoru da çox yaxından iştirak edə bilər. Bununla dövlət siyasətinin uğurlu şəkildə həyata keçirilməsinə bir növ töhfə vermiş olarlar. Düşünürəm ki, bütün tərəflərin iştirakının təmini, QHT-lərin də iştirakı ilə vahid bir platformadan çıxış etmək bütövlükdə uğurun əldə olunmasına xidmət edəcək. Burda mütəşşəkillik, sistemlilik, planlı şəkildə strateji konseptual əsaslara söykənən işin aparılması uğurun qazanılmasında əsas amilərdən biridir”.

Deputat vurğulayıb ki, bu səpkidə QHT-lər kifayət qədər fəaldırlar, potensial da çoxdur, onu maksimum reallaşdırmaq üçün imkanlar da var. Bu imkanları bir araya gətirməklə, bir mərkəzə akkumulyasiya etməklə daha böyük hədəflərə - ümummilli məsələ olan Qərbi Azərbaycana Qayıdış Konsepsiyasının uğurlu şəkildə reallaşmasına nail olmaq mümkündür. Buna xidmət edə biləcək siyasəti həyata keçirmək olduqca vacibdir ki, QHT-lər də bu prosesdə kifayət qədər fəaldırlar”.