Bağırsaq sağlamlığını yaxşılaşdırmaq üçün bir nömrəli OT

16 iyun 2025 00:20

Həzm sistemi təkcə qidanı parçalamaqla kifayətlənmir - burada trilyonlarla bakteriya və mikroorqanizmdən ibarət unikal mikrobiom yerləşir. Əgər özünüzü yorğun, halsız, əsəbi və ya narahat hiss edirsinizsə, bu zaman bağırsaq sağlamlığınıza diqqət yetirmək vaxtıdır. 

Qaynarinfo xəbər verir ki, "Eatingwell" nəşrinin yazdığına görə, mütəxəssislər bağırsaq mikrobiomunun həm fiziki, həm də psixi sağlamlıq üçün mühüm rol oynadığını bildirirlər.
Araşdırmalar göstərir ki, bağırsağın sağlamlığı birbaşa ümumi sağlamlıqla əlaqəlidir. Məsələn, bir araşdırmada uzunömürlü insanların daha çox lif qəbul etdiyi və nəticədə onların mikrobiomlarının gənclərə bənzədiyi müəyyən edilib.
"Sağlam bağırsağa üstünlük vermək bir neçə səbəbdən vacibdir. Bu, həm həzmin effektivliyi, həm immun sistemin gücləndirilməsi, həm də psixi sağlamlıq və əhval-ruhiyyənin tənzimlənməsi baxımından əhəmiyyətlidir”, deyə diyetoloq Cessi Vonq qeyd edib.
Bundan əlavə, bağırsaq sağlamlığı bir sıra xəstəliklərin qarşısının alınması və müalicəsi baxımından da mühümdür. Diyetoloq Bet Rozen bildirib ki, mikrobiom orqanizmdəki iltihabi reaksiyalara cavabdeh olduğu üçün onun sağlamlığının qorunması xroniki iltihabın - ürək-damar xəstəlikləri və diabet kimi halların - qarşısının alınmasında əsas rol oynayır.
 
Bağırsaq sağlamlığı üzrə mütəxəssislər nanəni bu sahədə ən faydalı ot hesab edirlər. Çünki nanənin tərkibindəki birləşmələr iltihab və spazmları azaldır, həmçinin zərərli mikroorqanizmlərə qarşı təsirlidir.
Araşdırmalara görə, nanə yağı həzm sistemindəki diskomfortu yüngülləşdirə, mədə pozğunluğunu azalda bilər və qısamüddətli rahatlıq üçün təhlükəsiz hesab olunur.
Qeyd olunur ki, tədqiqatlarda istifadə edilən doza gündəlik mətbəxdə istifadə etdiyimiz miqdardan fərqlənir. Yəni nanənin təsirini dərhal hiss etmək mümkün deyil. Lakin mədə ağrısı və ürəkbulanmanı azaltmaq üçün nanə çayı içmək faydalıdır.
"İngil, zərdəçöp (kurkuma) və razyana kimi digər otlar da mühüm faydalar verir. Ümumi bağırsaq sağlamlığını dəstəkləmək üçün bu bitkilərin və qidaların daxil olduğu kompleks yanaşma tətbiq edilməlidir”, deyə Cessi Vonq əlavə edib.




Oxşar xəbərlər
Xəbər lenti
Sorğu
Müharibən başlamasını istəyirsinizmi?

Səs ver Nəticələr


Cəmi səslər: 1367