Qalib Ordunun 107 ili: Şərəf, qələbə və güc tarixi

Bu gün dünyanın ən güclü orduları sırasında yer alan Azərbaycan Silahlı Qüvvələrinin yaranmasından 107 il ötür.

Ulu Öndər Heydər Əliyevin rəhbərliyi dövründə təməlləri möhkəmləndirilmiş Milli Ordumuzun şərəfli döyüş yolunun zirvəsində Vətən müharibəsində qazanılmış tarixi Qarabağ Zəfəri dayanır. Qəhrəman zabit və əsgərlərimiz Müzəffər Ali Baş Komandan İlham Əliyevin sərkərdəliyi ilə cəmi 44 gün ərzində 30 illik işğala son qoyaraq Azərbaycanı qalib ölkəyə çevirdi.

2023-cü ilin sentyabrında Qarabağda keçirilmiş lokal antiterror tədbirləri nəticəsində Azərbaycanın suverenliyi və ərazi bütövlüyü tam şəkildə bərpa olundu. Bu uğurlar Azərbaycan Ordusunun qarşıya qoyulan bütün döyüş tapşırıqlarını yüksək peşəkarlıqla yerinə yetirməyə qadir olduğunu bir daha sübut etdi. Hazırda orduda aparılan genişmiqyaslı islahatlar, xüsusilə türk ordu modelinə keçid və komando qüvvələrinin yaradılması nəticəsində Silahlı Qüvvələrimizin döyüş qabiliyyəti və peşəkarlığı durmadan artır. 

Musavat.com xəbər verir ki, Azərbaycan Ordusunun əsası 1918-ci il iyunun 26-da Azərbaycan Xalq Cümhuriyyətinin Nazirlər Şurasının qərarı ilə yaradılan Əlahiddə Azərbaycan Korpusu ilə qoyulub. Elə həmin il avqustun 1-də Azərbaycanın ilk Hərbi Nazirliyi təsis edildi. Xosrov bəy Sultanov, Səməd bəy Mehmandarov və Əlağa Şıxlinski kimi görkəmli hərbi xadimlər Milli Ordunun formalaşmasında mühüm rol oynayıblar. Müasir Azərbaycan Ordusunun inkişafında Ulu Öndər Heydər Əliyevin xidmətləri əvəzsizdir. Hələ sovet dövründə – 1971-ci il iyunun 20-də onun təşəbbüsü ilə Cəmşid Naxçıvanski adına hərbi məktəbin yaradılması, gənclərin SSRİ-nin qabaqcıl hərbi məktəblərinə göndərilməsi milli kadr potensialının formalaşmasına təkan verdi. Bu məktəbin məzunları Aprel döyüşlərində, Vətən müharibəsində və antiterror tədbirlərində böyük qəhrəmanlıqlar göstəriblər. 

1994-cü ilin yanvarında Azərbaycan Ordusu Füzuli rayonunun 20 kəndini, Horadiz qəsəbəsini və Cəbrayıl rayonunun Cocuq Mərcanlı kəndini işğaldan azad etdi. Ulu Öndər Heydər Əliyevin 1998-ci il 22 may tarixli Fərmanına əsasən, 26 İyun - Silahlı Qüvvələr Günü elan olundu.

Prezident İlham Əliyevin rəhbərliyi ilə ordu quruculuğu keyfiyyətcə yeni mərhələyə qədəm qoydu. Hərbi qulluqçuların peşəkarlığı, döyüş hazırlığı, mənəvi-psixoloji durumu yüksəldildi, ordu ən müasir texnika və silahlarla təchiz edildi. Dövlət büdcəsindən müdafiə xərclərinə ayrılan vəsaitlər dəfələrlə artırıldı. Azərbaycanın müdafiə sənayesi yaradıldı, müasir silah istehsalı təşkil olundu.

Azərbaycan Ordusunun artan gücü 2011-ci ildə keçirilən hərbi paradda nümayiş etdirildi. Daha sonra 2016-cı ilin Aprel döyüşləri, 2018-ci ildə Günnüt əməliyyatı ilə ordu ilk uğurlu əks-hücum əməliyyatlarını həyata keçirdi. Vətən müharibəsi isə bu inkişafın məntiqi nəticəsi oldu. Ordumuz 44 gün ərzində beş şəhəri, dörd qəsəbəni və 300-dək kəndi işğaldan azad edərək düşmənə sarsıdıcı zərbələr endirdi. Ermənistan kapitulyasiya aktını imzalamağa məcbur oldu. 2020-ci il dekabrın 10-da Azadlıq meydanında keçirilən Zəfər paradı bu tarixi Qələbənin rəsmi təntənəsinə çevrildi. Prezident İlham Əliyev və Türkiyə Prezidenti Rəcəb Tayyib Ərdoğanın birgə iştirakı ilə baş tutan parad həm də iki qardaş ölkə arasında strateji hərbi-siyasi ittifaqın simvolu oldu.

Vətən müharibəsi zamanı 2900-dən çox hərbi qulluqçumuz şəhid oldu. Onların qəhrəmanlığı yüksək qiymətləndirildi, 159 mindən çox hərbçi müxtəlif orden və medallarla təltif edildi. Prezident İlham Əliyevin 2023-cü il 25 iyun tarixli sərəncamları ilə Müdafiə Nazirliyinin daha 131 hərbçisi mükafatlandırıldı. Dövlət başçısı şəhid ailələrinə, qazilərə, veteranlara xüsusi qayğı ilə yanaşır, onların sosial müdafiəsi üçün davamlı addımlar atılır. Qarabağ Zəfərinin əbədiləşdirilməsi məqsədilə bir sıra layihələr həyata keçirilir.

2023-cü ilin sentyabrında keçirilən lokal antiterror tədbirləri nəticəsində separatçı rejimin və qanunsuz silahlı birləşmələrin mövcudluğuna son qoyuldu. Azərbaycanın konstitusiya quruluşu bərpa edildi, dövlət suverenliyi tam şəkildə təmin olundu. Həmin ilin noyabrında Xankəndidə keçirilmiş Zəfər paradı Azərbaycan Ordusunun məğlubedilməzliyini bir daha sübut etdi. Prezident İlham Əliyev Zəfər meydanında çıxışı zamanı xalq-ordu-dövlət birliyinin simvolunu təsdiqlədi.

Bu gün Silahlı Qüvvələrimiz vahid proqram əsasında inkişaf etdirilir. Ordumuz müharibə dövründə göstərdiyi qəhrəmanlıq və peşəkarlığı daha da təkmilləşdirməklə yanaşı, yeni texnika və silah sistemləri ilə təchiz edilir. Ötən ilin fevralında Prezident İlham Əliyev Hərbi Hava Qüvvələrinin hərbi obyektlərində olub, silahlanmaya yeni qəbul edilən “Akıncı” hücum PUA-larının uçuşunu izləyib. Həmin gün Ali Baş Komandan PUA Akademiyasında yaradılan şəraitlə də tanış olub. 

Azərbaycan Ordusu bu gün həm yerli, həm də beynəlxalq səviyyəli təlimlərdə fəal iştirak edir. Ötən ilin iyun ayında Azərbaycan, Türkiyə və Gürcüstan xüsusi təyinatlı qüvvələrinin iştirakı ilə “Qafqaz Qartalı – 2024” beynəlxalq taktiki-xüsusi təlimi keçirilib. Bu cür təlimlər iştirakçı ölkələrin hərbi əməkdaşlığını gücləndirməklə yanaşı, ordular arasında təcrübə mübadiləsinə töhfə verir. Eyni zamanda “Efes – 2024” və digər beynəlxalq təlimlərdə iştirak Azərbaycan Ordusunun beynəlxalq səviyyədə tanınmasına imkan yaradıb.

Bugünkü prioritetlərdən biri də Qarabağ və Şərqi Zəngəzurda aparılan genişmiqyaslı bərpa və yenidənqurma işləridir. Keçmiş məcburi köçkünlərin öz doğma yurdlarına qayıtması prosesi dövlət və ordu birlikdə həyata keçirilir. Azad olunmuş ərazilərdə təhlükəsizliyin təmin olunmasında, mühəndis təminatında və infrastrukturun bərpasında Azərbaycan Ordusu mühüm rol oynayır.

Bu il 26 İyun – Silahlı Qüvvələr Günü tam bərpa olunmuş ərazi bütövlüyümüzün fonunda, qalib Azərbaycan Ordusunun timsalında qeyd olunur. Bu, təkcə hərbi gücümüzün deyil, həm də dövlətçilik tariximizin, milli ruhumuzun təntənəsidir.