Dünyada İLK KABAB İNSTİTUTU fəaliyyətə başlayır

Çinin Xunan əyalətinin Yueyanq şəhərində dünyanın ilk kabab institutu yaxın vaxtlarda fəaliyyətə başlayacaq. Bu təhsil müəssisəsi Yueyanq Açıq Universiteti ilə şəhərin Kabab Assosiasiyası tərəfindən yerli hakimiyyət orqanlarının dəstəyi ilə birgə yaradılır.

Lent.az xarici mediaya istinadla bildirir ki, yeni təhsil platforması küçə yeməkləri sahəsini sistemləşdirmək və inkişaf etdirmək, onu aydın struktura malik tam bir sənaye sahəsinə çevirmək məqsədi daşıyır.

Yueyanq Açıq Universitetinin partiya təşkilatının katibi Yue Yanxuanın sözlərinə görə, institut yerli "kabab dükanları iqtisadiyyatını" müasir, inteqrasiya olunmuş bir sənayeyə çevirməyə kömək edəcək. Barbekü artıq şəhərin iqtisadiyyatında mühüm rol oynayır: Yueyanqda 2 mindən çox kababçı fəaliyyət göstərir və bu sahədə təxminən 50 min nəfər çalışır. Sənayenin illik dövriyyəsi isə təxminən 280 milyon ABŞ dollarını ötür.

Universitetin vitse-prezidenti Tszyan Tsunfunun qeyd etdiyinə görə, bu təşəbbüs həm də gənclər arasında işsizlik probleminin həllinə yönəlib. Bir çox məktəb məzunları iş tapmaqda çətinliklərlə üzləşirlər, halbuki barbekü sahəsi başlanğıc üçün əlçatan imkanlar və yüksək gəlir potensialı təklif edir. Yeni institut, ənənəvi bişirmə üsullarını müasir biznes yanaşmaları ilə birləşdirərək sahəni inkişaf etdirə biləcək mütəxəssislər yetişdirəcək.